UFC döyüşçüsü Arman Tsarukyan ABŞ-da turnirə yollanarkən sərnişin təyyarəsindən çıxarılıb. Açıq mənbələrdə yayılan məlumata görə, hadisə onun Filadelfiyaya uçan “American Airlines” reysində baş verib və Tsarukyanla birlikdə daha iki nəfər də reysdən endirilib.
MMA media mənbələrinin yazdığına görə, insidentin səbəbi kimi komandasından bir nəfərin havaya qalxma zamanı telefondan istifadə etməsi, digər şəxsin isə qatlanan masanı açması göstərilir. Bu məlumat jurnalist Adam Zubayraevin paylaşımına istinadla yayılıb.
Məlumata əsasən, Tsarukyan “Real American Freestyle” turnirinə yollanırdı və həmin tədbirdə Urijah Faber ilə qarşılaşması gözlənilir. Hazırda onun turnirdə iştirak edib-etməyəcəyi ilə bağlı hər hansı məlumat təsdiqlənməyib.
