Argentina Prezidenti Xavyer Miley Nyu-Yorkda İsrailə və yəhudi xalqına dəstəyinə görə “Ohev Yisrael” (“İsrail dostu”) mükafatına layiq görülüb. Miley mükafatı qəbul edərkən bu dəstəyini ömrünün sonunadək davam etdirəcəyini bildirib.
MSNews.az xəbər verir ki, mükafat Mileyə sentyabrın 22-də Nyu-Yorkdakı “Yeshiva Darchei Torah” təhsil müəssisəsində təqdim edilib. Argentina Prezidentinin rəsmi saytında dərc olunan məlumata görə, o, mükafatı şəxsi nailiyyət kimi deyil, İsrailə və yəhudi xalqına dəstəyini davam etdirmək öhdəliyi kimi qəbul etdiyini söyləyib.
Miley mərasimdəki çıxışının bir hissəsini iqtisadi baxışlarına həsr edib. O, kapitalizmin yalnız tamah üzərində qurulmuş sistem kimi təqdim edilməsi ilə razılaşmadığını bildirib. Argentina Prezidentinin fikrincə, kapitalizmin əsasını rifaha yönəlmək, şəxsi mülkiyyət hüququna və başqalarının mülkiyyətinə hörmət təşkil edir. O, bu hüquqların dövlət tərəfindən də pozulmamalı olduğunu vurğulayıb.
Miley çıxışında iqtisadi sistemlə bağlı mövqeyini dini və əxlaqi prinsiplərlə də əlaqələndirib. O, şəxsi mülkiyyətin qorunmasını və könüllü mübadiləni azad cəmiyyətin əsas şərtləri kimi xarakterizə edib.
