Rusiya Prezidenti Vladimir Putin Ukraynanın Krım körpüsünə endirdiyi zərbələrə daha sərt cavab veriləcəyini bəyan edib. O, hücumlardan sonra enerji obyektlərinə və Qara dənizdəki əməliyyatlara dair məhdud atəşkəs danışıqlarının aparılmayacağını bildirib.
MSNews.az xəbər verir ki, Putin bu barədə noyabrın 19-da Çinin Şençjen şəhərində keçirilən APEC sammitindən sonra mətbuat konfransında danışıb.
Rusiya lideri Krım körpüsünün mülki obyekt olduğunu iddia edərək Ukraynanın hücumlarını tənqid edib.
“Krım körpüsü müstəsna olaraq mülki obyektdir. Bu zərbələrdən sonra danışıqlar aparmayacağıq”, – deyə Putin bildirib.
Onun sözlərinə görə, Moskva əvvəllər enerji infrastrukturu və Qara dənizdə kommersiya gəmiçiliyinə qarşı hücumların dayandırılması imkanını nəzərdən keçirib. Lakin körpüyə son zərbələrdən sonra bu mövqeyindən imtina edib.
“Biz bu zərbələrə cavab verəcəyik. İstəyirəm ki, hamı bunu bilsin. Cavab tədbirlərimiz Kiyevin körpüyə etdiklərindən qat-qat ağrılı olacaq”, – deyə Rusiya Prezidenti xəbərdarlıq edib.
“Reuters” agentliyinin məlumatına görə, Putin körpünün bərpa olunacağını da bildirib.
“The Guardian” nəşri Ukrayna qüvvələrinin həmin həftə Krım körpüsünə üç dəfə hücum etdiyini yazıb. Zərbələr körpünün bir hissəsinə ciddi ziyan vurub, nəqliyyatın hərəkətində fasilələr yaranıb.
Qeyd edək ki, Krım körpüsü Rusiyanı 2014-cü ildə ilhaq etdiyi Ukraynanın Krım yarımadası ilə birləşdirir. Moskva onu mülki obyekt kimi təqdim etsə də, körpü müharibə dövründə hərbi logistika baxımından da strateji əhəmiyyət daşıyıb.