Kolumbiyanın keçmiş prezidenti Qustavo Petronu intim münasibətlər müqabilində dövlət müqavilələri verməkdə ittiham edən Deysi Ximenes sabiq dövlət başçısı ilə şəxsi münasibətlərini əks etdirdiyini bildirdiyi video yayımlayıb. Petro isə korrupsiya ittihamlarını rədd edib.
MSNews.az xəbər verir ki, bu barədə Kolumbiyanın “Semana” nəşri məlumat yayıb. Noyabrın 4-də yayımlanan görüntülərdə Petro və Ximenesin otaqda söhbət etdiyi, daha sonra bir-birini öpdüyü görünür. Videonun çəkilmə tarixi məlum deyil.
Ximenes görüntüləri sosial şəbəkədə paylaşaraq iddialarının doğruluğunu sübut etmək istədiyini bildirib. O, özünün və ailəsinin təhlükəsizliyindən narahat olduğunu vurğulayaraq dövlət qurumlarından müdafiə istəyib.
“Bu gün həqiqəti dediyimin sübutu kimi həmin videonu yayımlayıram. Kolumbiyalılar Qustavo Petronun kim olduğunu bilməyə layiqdirlər”, – deyə Ximenes bildirib.
Qadın daha əvvəl “Semana”ya müsahibəsində Petro ilə 2019-cu ildə, onun senator olduğu dövrdə tanış olduğunu açıqlayıb. Ximenesin iddiasına görə, sabiq prezident qadınlara şəxsi münasibətlər müqabilində dövlət qurumlarında iş və müqavilələr əldə etməyə kömək edib.
Müstəqil “La Silla Vacía” nəşrinin yoxladığı dövlət qeydləri Ximenesin 2023-cü ildən etibarən müxtəlif dövlət qurumları ilə müqavilələrinin olduğunu təsdiqləyir. Lakin bu fakt həmin müqavilələrin intim münasibətlər müqabilində verildiyini sübut etmir.
Qustavo Petro ittihamları rədd edərək dövlət müqavilələrindən şəxsi münasibətlər üçün istifadə etmədiyini bildirib. O, yayılan videoda heç bir müqavilə, ödəniş və ya dövlət qərarının əks olunmadığını vurğulayıb. “Noticias Caracol” xəbər verir ki, sabiq prezident görüntülərin ekspertiza və məhkəmə tərəfindən hələ qiymətləndirilmədiyini də qeyd edib.
Kolumbiyanın aidiyyəti qurumları iddialarla bağlı araşdırmalara başlayıb. Petronun qanunsuz müqavilələr verdiyi barədə ittihamlar hələ məhkəmə qaydasında təsdiqlənməyib.
Video görüntülərə “Telegram” kanalımızda baxa bilərsiniz.
