Ermənistanın Baş naziri Nikol Paşinyan ölkə parlamentində hakimiyyət və müxalifət deputatları arasında baş verən kütləvi davaya münasibət bildirib. Baş nazir insidentə görə bütün məsuliyyəti müxalifətin üzərinə qoyaraq hakim “Vətəndaş Müqaviləsi” partiyasının nümayəndələrinin hərəkətlərini dəstəklədiyini açıqlayıb.
MSNews.az xəbər verir ki, Paşinyan bu barədə oktyabrın 29-da hökumətin iclasından sonra keçirdiyi brifinqdə danışıb.
Ermənistanın Baş naziri parlamentdə yaşanan fiziki qarşıdurmanı şərh edərkən hakim partiyanın deputatlarının hərəkətlərini müdafiə edib.
“Mən zorakılığı pisləyirəm, lakin bu gün ‘Vətəndaş Müqaviləsi’ fraksiyasının gördüyü tədbirləri dəstəkləyirəm. Kiminsə müxalifətdə olması ona özünü həyasız aparmaq hüququ vermir”, – deyə Paşinyan bildirib.
Baş nazir baş verənlərə görə müxalifəti günahlandırıb.
“Hadisəyə görə bütün məsuliyyəti müxalifətin üzərinə qoyuram. Bəli, ‘Vətəndaş Müqaviləsi’ deputatlarının hərəkətlərini alqışlayır və dəstəkləyirəm. Stulla, yaxud başqa vasitə ilə – bu, adekvat və düzgün cavabdır”, – deyə o vurğulayıb.
Oktyabrın 29-da Ermənistan Milli Assambleyasında Hesablama Palatasına üzv seçilməsi məsələsinin müzakirəsi zamanı deputatlar arasında qarşıdurma yaranıb.
Hadisə hakim “Vətəndaş Müqaviləsi” fraksiyasının deputatı Taron Çaxoyanın çıxışı zamanı başlayıb.
Çaxoyan müxalif “Güclü Ermənistan” fraksiyasının nümayəndəsi Narek Karapetyanın qohumunun seçkiqabağı dövrdə səsləndirdiyi mübahisəli fikirləri xatırladıb.
Buna etiraz edən Karapetyan əvvəlcə yerindən cavab verib, daha sonra tribunaya yaxınlaşıb.
Sözlü mübahisə qısa müddətdə deputatlar arasında fiziki qarşıdurmaya çevrilib.
İnsident zamanı hakim partiyanın üzvü, parlament sədrinin müavini Vaaqn Aleksanyanın müxalifət deputatlarına stul atdığı görüntülər yayılıb.
Qarşıdurmada bir neçə deputat iştirak edib.
Məlumatlara görə, “Güclü Ermənistan” fraksiyasından Andranik Gevorkyanın burnu qanayıb, deputat Ruben Mxitaryanın isə geyimi cırılıb.
Hadisə yerinə təcili tibbi yardım çağırılıb. Parlamentdə iclasa fasilə verilib və təhlükəsizlik əməkdaşları müdaxilə ediblər.
Baş nazir açıqlamasında müxalifət nümayəndələrinin hakim partiya deputatlarına qarşı fiziki hərəkətlərinə sərt cavab veriləcəyini də bildirib.
“Kimsə deputata əl qaldırıb onu vura biləcəyini düşünürsə, biz o əli sındıracağıq. Lazım gələrsə, stulla da sındıracağıq”, – deyə Paşinyan xəbərdarlıq edib.
O, parlamentdə müxalifət nümayəndələrinin davranışlarına bundan sonra da oxşar reaksiya verilə biləcəyini söyləyib.
Qeyd edək ki, Paşinyanın müxalifəti məsuliyyətli sayması onun siyasi mövqeyidir. Qarşıdurmada iştirak edən tərəflərin hüquqi məsuliyyəti barədə yekun rəsmi qərar açıqlanmayıb.
