Ermənistan parlamenti Azərbaycanla Naxçıvan arasında nəqliyyat əlaqəsinin yaradılmasını nəzərdə tutan TRIPP layihəsi üzrə ABŞ ilə strateji əməkdaşlıq sazişini ratifikasiya edib. Oktyabrın 28-də keçirilən səsvermədə sənədin lehinə 63, əleyhinə isə 32 deputat səs verib. Bitərəf qalan olmayıb.
MSNews.az xəbər verir ki, bu barədə Ermənistanın “News-Armenia” agentliyi məlumat yayıb.
Söhbət Ermənistanla ABŞ arasında “Beynəlxalq Sülh və Rifah naminə Tramp Marşrutu” (TRIPP) layihəsi üzrə strateji əməkdaşlığa dair çərçivə sazişindən gedir.
Sənəd 2026-cı il iyunun 1-də ABŞ dövlət katibi Marko Rubio, iyunun 4-də isə Ermənistanın xarici işlər naziri Ararat Mirzoyan tərəfindən imzalanıb.
TRIPP layihəsi Ermənistanın Sünik vilayəti ərazisindən keçən nəqliyyat infrastrukturunun yaradılmasını nəzərdə tutur.
Layihənin əsas məqsədlərindən biri Azərbaycanın əsas hissəsi ilə Naxçıvan Muxtar Respublikası arasında maneəsiz nəqliyyat bağlantısının təmin edilməsidir.
Bununla yanaşı, layihə çərçivəsində dəmir yollarının, avtomobil magistrallarının, elektrik ötürücü xətlərin və fiber-optik rabitə infrastrukturunun inkişafı planlaşdırılır.
Gələcəkdə neft və qaz kəmərlərinin yaradılması imkanları da nəzərdən keçirilə bilər.
TRIPP layihəsinin birgə idarəetmə şirkətində nəzərdə tutulan pay bölgüsü
Razılaşmaya əsasən, layihənin həyata keçirilməsi üçün “TRIPP Development Company” adlı birgə şirkətin yaradılması nəzərdə tutulur.
Şirkətin ilkin mülkiyyət strukturunda ABŞ tərəfinin 74%, Ermənistanın isə 26% paya sahib olması planlaşdırılır.
Sazişdə ilkin 49 illik müddət və tərəflərin razılığı ilə əlavə 50 il uzadılma imkanı da əksini tapıb.
Ermənistanın xarici işlər naziri Ararat Mirzoyan parlamentdə bildirib ki, layihə çərçivəsində tikiləcək və ya bərpa olunacaq bütün infrastruktur Ermənistanın suverenliyi və yurisdiksiyası çərçivəsində fəaliyyət göstərəcək.
Onun sözlərinə görə, layihə Ermənistanın da Azərbaycan ərazisindən istifadə etməklə üçüncü ölkələrlə nəqliyyat əlaqələrini genişləndirməsinə imkan yaradacaq.
TRIPP layihəsi 2025-ci il avqustun 8-də Vaşinqtonda Azərbaycan Prezidenti İlham Əliyev və Ermənistanın Baş naziri Nikol Paşinyan arasında ABŞ Prezidenti Donald Trampın iştirakı ilə əldə edilmiş razılaşmaların davamıdır.
2026-cı ildə ABŞ və Ermənistan layihənin icra mexanizmlərini müəyyənləşdirən sənədlər hazırlayıblar.
Ermənistan parlamentinin son qərarı layihənin hüquqi əsaslarının formalaşdırılması istiqamətində mühüm mərhələdir. Bununla belə, ratifikasiya nəqliyyat marşrutunun artıq istifadəyə verilməsi demək deyil. İnfrastrukturun tikintisi və istismarı ayrıca icra mərhələlərindən asılıdır.
