Azərbaycan tərəfindən “arzuolunmaz şəxs” elan edilərək ölkəyə girişi qadağan olunan Türkiyə vətəndaşı Məhəmməd Əmin Yıldırım İstanbulda saxlanılıb. “Köklü Değişim” media qrupunun İstanbul təmsilçisi olan Yıldırımın sosial şəbəkələrdəki paylaşımlarına görə polis tərəfindən saxlanıldığı bildirilir.
MSNews.az xəbər verir ki, bu barədə Türkiyənin “Cumhuriyet” nəşri məlumat yayıb.
Məlumata görə, Yıldırım oktyabrın 26-da İstanbul Polis İdarəsinin əməkdaşları tərəfindən saxlanılıb.
“Köklü Değişim Medya” sosial şəbəkə hesabında yaydığı açıqlamada təmsilçisinin saxlanıldığını təsdiqləyib.
“Ötən həftə Azərbaycan tərəfindən arzuolunmaz şəxs elan edilərək ölkəyə girişi qadağan olunan İstanbul təmsilçimiz Məhəmməd Əmin Yıldırım sosial şəbəkə paylaşımları əsas gətirilərək İstanbul polisi tərəfindən saxlanılıb”, – deyə açıqlamada bildirilib.
Media qrupu hüquqi prosesi vəkil vasitəsilə izlədiyini də qeyd edib.
Bununla belə, Yıldırımın konkret hansı paylaşımlarına görə saxlanıldığı açıqlanmayıb. Türkiyənin hüquq-mühafizə orqanları da saxlanılmanın hüquqi əsasları və aparılan araşdırmanın təfərrüatları barədə rəsmi məlumat yaymayıb.
Xatırladaq ki, Azərbaycan Xarici İşlər Nazirliyi oktyabrın 21-də Türkiyənin 31 vətəndaşını “arzuolunmaz şəxs” elan edərək ölkəyə girişini qadağan edib.
Nazirliyin açıqlamasında bildirilib ki, qərar həmin şəxslərin sosial şəbəkələrdə və internet platformalarında Azərbaycanın suverenliyinə, milli təhlükəsizliyinə, konstitusiya quruluşuna, xalqına və dövlət rəhbərliyinə qarşı yönəlmiş bəyanatları nəzərə alınaraq qəbul edilib.
XİN bu şəxslərin hakimiyyətin zorakılıqla dəyişdirilməsinə, dini radikalizm zəminində zorakılığa, dini nifrət və düşmənçiliyin qızışdırılmasına yönəlmiş çağırışlarını da qərarın əsasları sırasında göstərib.
Məhəmməd Əmin Yıldırım da Azərbaycanın ölkəyə girişini qadağan etdiyi 31 nəfərlik siyahıya daxil edilib.
Siyahıda siyasətçilər, jurnalistlər, ictimai xadimlər və din adamları da yer alıb. Onların arasında Yenidən Rifah Partiyasının sədri Fatih Ərbakan, millət vəkili Ömər Faruk Gərgərlioğlu və idman şərhçisi Əhməd Çakar da var.
Hazırda Yıldırımın Türkiyədə saxlanılması ilə Azərbaycanın tətbiq etdiyi giriş qadağası arasında birbaşa hüquqi əlaqənin olub-olmadığı məlum deyil. Onun barəsində aparılan araşdırmanın nəticəsi və mümkün ittihamlar barədə əlavə məlumat açıqlanmayıb.
