ABŞ Prezidenti Donald Trampın kürəkəni Cared Kuşner Ukrayna Prezidenti Volodimir Zelenskidən Rusiyanın neft emalı zavodlarına hücumların dayandırılmasını tələb edib. Məlumata görə, Kuşner bu məsələni Norveçin paytaxtı Osloda keçirilən sülh danışıqlarında yenidən gündəmə gətirib.
MSNews.az xəbər verir ki, bu barədə ABŞ-nin “Axios” nəşri danışıqlardan məlumatlı mənbəyə istinadən yazıb.
Nəşrin məlumatına əsasən, oktyabrın 20-də Osloda ABŞ, Ukrayna və Avropa ölkələrinin nümayəndələri arasında Rusiyanın Ukraynaya qarşı müharibəsinin dayandırılması imkanları müzakirə olunub. Danışıqlarda Ukrayna Prezidenti Volodimir Zelenski, ABŞ Prezidentinin xüsusi nümayəndəsi Stiv Vitkoff və bir sıra Avropa liderləri iştirak ediblər.
Cared Kuşner isə görüşə videobağlantı vasitəsilə qoşulub.
“Axios”a danışan mənbənin sözlərinə görə, Kuşner Ukraynadan Rusiya ərazisindəki neft emalı zavodlarına zərbələri dayandırmağı bir daha tələb edib. “Cared çox açıq və birbaşa danışırdı”, – deyə nəşrin həmsöhbəti bildirib.
Məlumata əsasən, ABŞ tərəfi Rusiyanın neft infrastrukturuna hücumların dayandırılmasını mümkün sülh razılaşmasına aparan addımlardan biri kimi qiymətləndirir. Vaşinqton hesab edir ki, Rusiya neft emalı müəssisələrinə hücumlar dünya enerji bazarına təsir göstərir və ABŞ-da yanacağın qiymətlərinin yüksəlməsinə səbəb olan amillərdən biridir.
Ukrayna isə hücumların birtərəfli qaydada dayandırılmasını qəbul etmək istəmir.
Kiyev Rusiya neft infrastrukturunun Ukraynaya qarşı hərbi əməliyyatların maliyyələşdirilməsində rol oynadığını bildirir.
Zelenski daha əvvəl açıqlamışdı ki, Ukrayna Rusiyanın neft emalı zavodlarına zərbələri dayandırmağa hazırdır, lakin bunun qarşılığında Moskva da Ukraynanın enerji infrastrukturuna hücumları dayandırmalıdır. Ukrayna Prezidenti ABŞ ilə müzakirələrdə neft emalı müəssisələrinə hücumların 30 gün müddətinə dayandırılması imkanını da gündəmə gətirib.
Bunun müqabilində Kiyev hava hücumundan müdafiə imkanlarının gücləndirilməsini və “Patriot” sistemləri üçün raketlərin çatdırılmasını vacib hesab edir.
Osloda yeni sülh təklifləri müzakirə olunub
“Axios”un məlumatına görə, görüşün əsas mövzusu Ukraynadakı müharibənin dayandırılması üçün tərəflərin razılaşa biləcəyi vahid təkliflər paketinin hazırlanması olub. Mənbə bildirib ki, Ukrayna nümayəndə heyəti danışıqlar zamanı yeni ideyalar irəli sürüb və iştirakçılar həmin təklifləri ətraflı müzakirə ediblər.
ABŞ Prezidentinin xüsusi nümayəndəsi Stiv Vitkoffun isə bu təklifləri Rusiya Prezidenti Vladimir Putinə təqdim etmək üçün yaxın vaxtlarda Rusiyaya səfər etməsi gözlənilir. Bununla belə, Moskvanın yeni təkliflərə necə münasibət göstərəcəyi hələ məlum deyil.
