Kremlin mətbuat katibi Dmitri Peskov Ukrayna ilə sülh danışıqlarına keçid üçün hazırda heç bir ilkin şərtin olmadığını açıqlayıb. O, Rusiya Prezidenti Vladimir Putinlə Ukrayna Prezidenti Volodimir Zelenski arasında mümkün görüşün Moskvada keçirilə biləcəyini bildirib.
MSNews.az xəbər verir ki, Peskov sentyabrın 23-də jurnalistlərə açıqlamasında Rusiyanın sülh danışıqlarına açıq olduğunu, lakin mövcud şəraitin danışıqların irəliləməsinə imkan vermədiyini deyib.
Bu barədə “Reuters” məlumat yayıb.
Kreml rəsmisi Avropa ölkələrinin Ukraynaya hərbi yardım göstərməsini və Kiyevin hərbi fəaliyyətini davam etdirməsini sülh prosesinə maneə kimi qiymətləndirib.
Peskov Putinlə Zelenski arasında mümkün görüşə də münasibət bildirib. Onun sözlərinə görə, Ukrayna Prezidenti Moskvaya gəlmək istədiyi təqdirdə ona zəruri təhlükəsizlik təminatları veriləcək.
“Putin bildirib ki, Zelenski istəsə, Moskvaya gələ bilər. Ona bütün zəruri təhlükəsizlik təminatları veriləcək”, – deyə Peskov vurğulayıb.
Kreml sözçüsü ekspertlər səviyyəsində hazırlıq aparılmadan liderlər arasında görüş keçirilməsini məqsədəuyğun hesab etmədiyini də bildirib. Onun fikrincə, belə bir görüş vaxt itkisi olardı.
Peskov Ukrayna tərəfinin atəşkəs çağırışlarına da şübhə ilə yanaşıb. O, Kiyevin hərbi imkanlarını gücləndirməyə davam etdiyini iddia edərək Rusiyanın müvəqqəti atəşkəs deyil, uzunmüddətli sülh razılaşması istədiyini söyləyib.
Ukrayna tərəfi isə Rusiya ilə qarşılıqlı atəşkəsə hazır olduğunu bildirir. Zelenski sentyabrın 22-də ABŞ Prezidenti Donald Trampla görüşündən sonra hər iki ölkənin enerji infrastrukturuna hücumların dayandırılmasını nəzərdə tutan razılaşmaya hazır olduqlarını açıqlayıb. Kiyev eyni zamanda liderlər arasında danışıqların neytral ölkədə keçirilməsini təklif edir.
