İran müharibənin dayandırılması və ABŞ ilə danışıqların bərpası üçün irəli sürdüyü şərtləri Qətər vasitəsilə Vaşinqtona çatdırıb. Tehran bütün cəbhələrdə döyüşlərin dayandırılmasını, dondurulmuş maliyyə aktivlərinin açılmasını və dəniz blokadasının ləğvini tələb edir.
MSNews.az xəbər verir ki, İran Milli Təhlükəsizlik Ali Şurasının katibi Möhsün Rezai bu barədə sentyabrın 19-da “Əl-Cəzirə” telekanalına müsahibəsində danışıb.
Rezainin sözlərinə görə, Qətər vasitəçiləri İranın şərtlərini ABŞ tərəfinə təqdim ediblər və Tehran hazırda Prezident Donald Trampın cavabını gözləyir. O, Vaşinqtonun bu tələbləri qəbul etməsinin müharibənin dayandırılmasına yol aça biləcəyini bildirib.
İran rəsmisi Yəməndəki “Ənsar Allah” hərəkatı ilə Səudiyyə Ərəbistanı arasında yenidən kəskinləşən qarşıdurmaya da toxunub. Rezai Tehranın bu qarşıdurmanın başa çatmasında maraqlı olduğunu və husilərin də Ər-Riyadla razılaşma əldə etmək istədiyini düşündüyünü söyləyib.
İranın bütün cəbhələrdə döyüşlərin dayandırılması tələbi mümkün razılaşmanın yalnız ABŞ–İran qarşıdurması ilə məhdudlaşmaması məsələsini gündəmə gətirir. Vaşinqtonun Tehranın təqdim etdiyi şərtləri qəbul etdiyi barədə hələlik rəsmi açıqlama verilməyib.
