Rusiyanın zərbələri nəticəsində Ukraynada polad istehsalının təxminən 90 faizini təmin edən üç iri metallurgiya zavodu fəaliyyətini dayandırıb. Müəssisələrə dəymiş ziyanın aradan qaldırılması və istehsalın bərpası üçün nə qədər vaxt lazım olacağı hələlik məlum deyil.
MSNews.az xəbər verir ki, bu barədə “Financial Times” qəzeti məlumat yayıb. Nəşrin yazdığına görə, Zaporojye və Dnepropetrovsk vilayətlərində yerləşən üç iri poladəritmə müəssisəsi Rusiya raket zərbələrindən sonra istehsalı dayandırmalı olub.
Söhbət “Metinvest” holdinqinə məxsus “Zaporojstal” və “Kamet Steel”, eləcə də “ArcelorMittal” şirkətinin Krivoy Roqdakı zavodundan gedir. Məlumata əsasən, hücumlar müəssisələrin istehsal avadanlıqlarına, o cümlədən domna sobalarına ziyan vurub.
“Metinvest”in baş direktorunun ofis rəhbəri Aleksandr Vodoviz vəziyyəti şərh edərkən bildirib: “Bugünkü vəziyyətə görə, Ukraynanın artıq poladəritmə sənayesi yoxdur”. Onun sözlərinə görə, təmir işlərinin günlər, həftələr, aylar, yoxsa illər çəkəcəyini müəyyənləşdirmək hazırda mümkün deyil.
Üç zavodun fəaliyyətinin dayanması 15 mindən çox işçinin məşğulluğuna, ölkənin sənaye istehsalına və vergi daxilolmalarına təsir göstərə bilər.
Qeyd edək ki, Vodovizin açıqlaması ölkənin əsas polad istehsalı müəssisələrinin dayanması ilə bağlıdır. Üç zavodun əvvəlki istehsalın təxminən 90 faizini təmin etməsi Ukraynada bütün metallurgiya fəaliyyətinin birdəfəlik və tamamilə sıradan çıxdığı anlamına gəlmir.
