Kubada 10 min və 20 min pesoluq yeni əskinasların dövriyyəyə buraxılması ölkədəki inflyasiya və milli valyutanın dəyərdən düşməsi ilə bağlı müzakirələri yenidən gündəmə gətirib. Bəzi sakinlər daha yüksək nominallı pul nişanlarının istifadəyə verilməsini gündəlik alış-veriş üçün getdikcə daha çox nağd pula ehtiyac duyulmasının göstəricisi hesab edirlər.
MSNews.az xəbər verir ki, Kuba Mərkəzi Bankının qərarına əsasən, yeni əskinaslar sentyabrın 16-dan etibarən əvvəlcə Havanada, daha sonra isə mərhələli şəkildə ölkənin digər bölgələrində dövriyyəyə buraxılır. Aprel ayında istifadəyə verilmiş 2 min və 5 min pesoluq əskinaslarla birlikdə bu addım ölkənin nağd pul sisteminin yenilənməsinin bir hissəsidir.
Mərkəzi Bank yeni nominalların tətbiqini nağd pula artan tələbatın qarşılanması, iri məbləğli ödənişlərin asanlaşdırılması və pulun daşınması ilə bağlı xərclərin azaldılması zərurəti ilə izah edib. Qurum ölkədə inflyasiyanın davam etdiyini də etiraf edib.
“Reuters” agentliyinin məlumatına görə, Kubada qiymət artımı və nağd pul çatışmazlığı səbəbindən bankların qarşısında uzun növbələr yaranır. Sakinlər həm məhdud məbləğdə pul çıxara bildiklərindən, həm də gündəlik tələbat mallarını almağın çətinləşməsindən şikayətlənirlər.
Yeni əskinasların buraxılması özlüyündə inflyasiyanın artacağı demək deyil. Onların qiymətlərə təsiri dövriyyədəki ümumi pul kütləsinin necə dəyişməsindən və ölkənin iqtisadi şəraitindən asılıdır. Mərkəzi Bank isə qərarın əsas məqsədinin mövcud qiymət səviyyəsində nağd ödənişləri asanlaşdırmaq olduğunu bildirir.
