Yaponiyada keçirilən 2026-cı il Asiya Oyunlarında Cənubi Koreyanın kişilərdən ibarət otüstü xokkey komandası ilə Banqladeş arasında görüşdən əvvəl səhvən Şimali Koreyanın dövlət himni səsləndirilib.
MSNews.az xəbər verir ki, hadisə sentyabrın 18-də Gifu prefekturasındakı “Kakamigahara Green Stadium”-da baş verib. Stadion diktoru əvvəlcə Cənubi Koreyanın himninin səsləndiriləcəyini elan etsə də, dinamiklərdən Şimali Koreyanın himni eşidilib.
Cənubi koreyalı oyunçular səhvi dərhal hiss ediblər. Kadrlarda onların bir-birinə baxdığı, bəzilərinin çaşqınlıq içində olduğu, bəzi idmançıların isə əllərini sinələrindən çəkmədən himnin sonunadək ayaq üstə qaldığı görünür.
Himn bitdikdən sonra stadionda təxminən iki dəqiqəlik fasilə yaranıb və diktor səhvə görə açıq şəkildə üzr istəyib. Daha sonra Banqladeşin, ardınca isə Cənubi Koreyanın düzgün dövlət himni səsləndirilib. Vaxt məhdudiyyəti səbəbindən koreyalı oyunçuların öz himnləri davam edərkən artıq matça hazırlıq prosedurlarına başlamaları tələb olunub.
Qarşılaşma Cənubi Koreyanın 5:0 hesablı qələbəsi ilə başa çatıb. Asiya Oyunlarının rəsmi açılışı sentyabrın 19-da keçiriləcək, lakin bəzi yarışlar sıx təqvimə görə daha əvvəl başlayıb.
