ABŞ administrasiyası İran Prezidenti Məsud Pezeşkian, xarici işlər naziri Abbas Araqçi və digər yüksək vəzifəli rəsmilərə BMT Baş Assambleyasının Nyu-Yorkda keçiriləcək yüksək səviyyəli tədbirlərində iştirak etmək üçün viza verilməsini təsdiqləyib.
MSNews.az xəbər verir ki, “Reuters” ABŞ və İran arasında fevralın 28-dən davam edən hərbi qarşıdurmaya baxmayaraq, Vaşinqtonun İran nümayəndə heyətinin səfərinə icazə verdiyini yazır. ABŞ qərarı BMT-nin ev sahibi ölkəsi kimi 1947-ci il Baş Qərargah Sazişi üzrə öhdəlikləri ilə əlaqələndirib.
Bununla belə, İran nümayəndə heyətinin ABŞ daxilində hərəkətinə ciddi coğrafi məhdudiyyətlər tətbiq ediləcək. Dövlət Departamenti iranlı rəsmilərin dəbdəbəli mallar almasına da icazə verilməyəcəyini bildirib. Nümayəndə heyətinin əvvəlki illərlə müqayisədə daha kiçik olacağı gözlənilir.
ABŞ 2026-cı ilin yanvarından İran vətəndaşlarına viza verilməsini böyük ölçüdə dayandırıb. Bununla yanaşı, diplomatik və rəsmi səfərlər üçün istisnalar mövcuddur və ayrıca milli maraq əsasında fərdi istisnalar verilə bilər.
BMT-nin 81-ci Baş Assambleyasının sessiyası sentyabrın 8-də açılıb. Dövlət və hökumət başçılarının iştirak etdiyi əsas ümumi debat sentyabrın 22-dən 28-dək keçiriləcək.
“Associated Press” qeyd edir ki, İran rəsmilərinə viza verilməsi ABŞ-nin Fələstin Administrasiyasının prezidenti Mahmud Abbasa və digər yüksək vəzifəli Fələstin nümayəndələrinə BMT sessiyası üçün viza verməkdən imtina etməsi fonunda baş verir.
