ABŞ-nin “Kimberly-Clark” şirkəti tualet kağızı və kağız dəsmalların istehsalında ağac lifinə alternativ kimi hesperaloe bitkisindən istifadə etməyi planlaşdırır.
MSNews.az xəbər verir ki, “The Wall Street Journal” şirkətin bu sahədə 20 ildən çox araşdırma apardığını və layihəyə təxminən 250 milyon dollar yatırdığını yazıb. Şirkətin sınaqlarına əsasən, hesperaloe lifindən hazırlanan məhsullar ağac əsaslı analoqlardan daha yumşaq və möhkəm ola bilər.
Az su tələb edən hesperaloe ABŞ-nin quraq cənub-qərb bölgələrində yetişir. Şirkət Arizona ştatının Yuma şəhərində pilot müəssisə tikir və texnologiya üzrə 30-dan çox patentə malikdir. Kütləvi istehsalın maya dəyəri və kommersiya imkanları isə hələ araşdırılır.
“Kimberly-Clark” təşəbbüsü uzunmüddətli “Ay missiyası” adlandırır. Məqsəd gələcəkdə təbii meşələrdən əldə edilən liflərdən asılılığı azaltmaqdır, lakin hesperaloe əsaslı məhsulların satış tarixi hələ açıqlanmayıb.
