MSNews.az xəbər verir ki, Rusiya gecə saatlarında Ukraynanın müxtəlif bölgələrinə genişmiqyaslı raket və pilotsuz uçuş aparatları ilə hücum həyata keçirib. Ukrayna rəsmilərinin məlumatına görə, zərbələr nəticəsində azı 9 nəfər həlak olub, onlarla insan yaralanıb.
Ən ağır itkilər Dnepropetrovsk vilayətinin Krivoy Roq şəhərində qeydə alınıb. Raketin yaşayış evinə düşməsi nəticəsində eyni ailənin altı üzvü həyatını itirib. Ölənlər arasında 5 və 12 yaşlı iki qızın da olduğu bildirilir. Daha səkkiz nəfər, o cümlədən 6 və 15 yaşlı iki oğlan müxtəlif dərəcəli xəsarətlər alıb. Ukrayna xilasediciləri dağıntılar altında qalan şəxslərin axtarışını davam etdirirlər. (Reuters)
Paytaxt Kiyevdə hücum nəticəsində azı bir nəfər ölüb, iki nəfər yaralanıb. Şəhərin bir neçə rayonunda yanğınlar baş verib və yaşayış binalarına ziyan dəyib. Lvovda isə raket zərbələri nəticəsində ən azı 15 nəfər xəsarət alıb, çoxmərtəbəli yaşayış binaları və mülki infrastruktur zədələnib.
Poltava rayonunda bir nəfərin öldüyü bildirilir. Hücum zamanı “Nova Poşta” şirkətinin anbarları və terminalına ziyan dəyib, həmçinin özəl müəssisələrdən birinin anbarlarında yanğın baş verib. Kiyev vilayətində isə beş nəfər yaralanıb, fərdi yaşayış evlərindən biri qismən dağılıb.
Ukrayna Prezidenti Volodimir Zelenski Rusiyanın gecə ərzində ölkəyə 70-dən çox raket və təxminən 280 pilotsuz uçuş aparatı ilə hücum etdiyini bildirib. Onun sözlərinə görə, hava hücumundan müdafiə qüvvələri hədəflərin böyük hissəsini məhv etsə də, ballistik raketlərin əhəmiyyətli hissəsini zərərsizləşdirmək mümkün olmayıb. Zelenski müttəfiqləri Ukraynanın hava hücumundan müdafiə sistemlərinin gücləndirilməsi üçün əlavə dəstək göstərməyə çağırıb.
