Ceffri Epşteynlə əlaqələri və barəsində irəli sürülən zorlama və insan alveri iddiaları ilə gündəmə gələn fransalı model skautu Daniel Siad Paris yaxınlığındakı evində ölü tapılıb.
MSNews.az xəbər verir ki, 69 yaşlı Siadın meyiti iyulun 20-də Parisin şimal-qərbində yerləşən Kolomb şəhərindəki evində aşkarlanıb. “Reuters” Nanter prokurorluğuna istinadən bildirir ki, ölümün səbəbinin müəyyənləşdirilməsi üçün meyityarma təyin olunub.
İyulun 23-də keçirilən meyityarmanın ilkin nəticələrinə əsasən, Siadın bədənində ölümlə əlaqəli ola biləcək yeni zorakılıq izləri aşkarlanmayıb. Bununla belə, ekspertiza ölümün birbaşa səbəbini müəyyən edə bilməyib. Prokurorluq Siadın səhhətində problemlərin və daha əvvəl keçirdiyi infarktın izlərinin aşkarlandığını, toksikoloji və patoloji analizlərin davam etdiyini açıqlayıb. Bu barədə “Reuters” məlumat yayıb.
Siadın vəkili Menya Arab-Tiqrin onun infarkt nəticəsində öldüyünü bildirib. Lakin bu versiya hələlik Fransa hakimiyyəti tərəfindən ölümün rəsmi səbəbi kimi təsdiqlənməyib.
ABŞ Ədliyyə Nazirliyinin açıqladığı Epşteyn sənədlərində Daniel Siadın adı təxminən 2 min dəfə keçir. Fevral ayında həmin sənədlərin dərcindən sonra Fransada insan alveri və vergi fırıldaqçılığı şübhələri üzrə genişmiqyaslı araşdırma başladılıb. Paris prokurorluğunun məlumatına görə, 24 qadın Siad və ya digər şəxslərlə bağlı iddia olunan hadisələr üzrə zərərçəkmiş və ya şahid kimi hüquq-mühafizə orqanlarına müraciət edib.
Fransa mediasının məlumatına əsasən, azı beş qadın Siadı zorlama və insan alverində ittiham edib. Siad isə bütün iddiaları rədd edərək Epşteynlə münasibətlərinin yalnız peşəkar xarakter daşıdığını bildirib. “Le Monde” yazır ki, model seçimi ilə məşğul olan Siad barəsində bir neçə şikayət, o cümlədən zorlama iddiaları mövcud idi.
Araşdırma çərçivəsində Siadın telefon danışıqları dinlənilib və o, xüsusi müşahidə tədbirlərinə cəlb olunub. Lakin prokurorluğun açıqlamasına görə, onun saxlanılması və ya dərhal formal istintaqa cəlb edilməsi üçün kifayət qədər sübut əldə olunmayıb. Bu səbəbdən Siadın təqsiri məhkəmə tərəfindən müəyyən edilməmişdi.
Siadın vəkili müvəkkilinin dəfələrlə istintaqa ifadə vermək istədiyini, lakin ölümünədək dindirilmədiyini bildirib. Vəkilin sözlərinə görə, Siad günahsız olduğunu daim bəyan edib.
Paris prokurorluğu Daniel Siadın ölümündən sonra da insan alveri və maliyyə cinayətləri ilə bağlı araşdırmanın davam edəcəyini açıqlayıb. İş üzrə təxminən 10 müstəntiqin fəaliyyət göstərdiyi bildirilir.
