Andrea Pirlo İtaliya millisinin yeni baş məşqçisi olmağa razılıq verib. Təyinatın rəsmiləşdirilməsi üçün qalan prosedurların yaxın günlərdə tamamlanacağı gözlənilir.
MSNews.az xəbər verir ki, transfer insayderi Fabrizio Romano 47 yaşlı mütəxəssisin İtaliya Futbol Federasiyasının şifahi təklifini qəbul etdiyini bildirib.
Məlumata görə, Pirlo federasiyanın texniki direktoru Paolo Maldini və onun müşaviri Leonardo tərəfindən təqdim edilən uzunmüddətli layihəyə razılıq verib. Tərəflər arasında müqavilənin 2030-cu ilədək qüvvədə olması nəzərdə tutulur. Sənədlərin yaxın günlərdə imzalanacağı bildirilir.
“Reuters” də İtaliyanın Pirlo ilə dördillik müqavilə bağlamağa hazırlaşdığını yazıb. Bununla belə, federasiya təyinatı hələ rəsmi kanalları vasitəsilə elan etməyib. Buna görə Pirlo hazırda faktiki olaraq razılıq verən və müqavilə imzalaması gözlənilən namizəd hesab olunur.
Pirlo bundan əvvəl Karlo Ançelotti və Pep Qvardiolanın İtaliya millisində işləmək təklifini qəbul etməməsindən sonra əsas namizədə çevrilmişdi. Nikolò Skira Maldininin məhz Pirlo variantını dəstəklədiyini və yekun qərarın bu həftə veriləcəyini bildirmişdi.
Qvardiolanın İtaliya Futbol Federasiyasının təklifini şəxsi və ailəvi səbəblərə görə rədd etdiyi, Ançelottinin isə Braziliya millisində qalmaq qərarına gəldiyi bildirilir.
Andrea Pirlo hazırda Birləşmiş Ərəb Əmirliklərinin birinci divizionunda çıxış edən “Dubai United” klubunun baş məşqçisidir. O, məşqçi kimi daha əvvəl “Yuventus”, “Fatih Karagümrük” və “Sampdoriya”da çalışıb. “Yuventus”la İtaliya Kubokunu və Superkubokunu qazanıb.
Pirlo futbolçu kimi İtaliya millisində 116 oyun keçirib və 2006-cı ildə dünya çempionu olub.
