Portuqaliyanın ən köklü futbol klublarından biri olan “Boavişta” ciddi maliyyə böhranı səbəbindən fəaliyyətini dayandırmaq təhlükəsi ilə üzləşib.
MSNews.az xəbər verir ki, iflas prosesini idarə edən Mariya Klaris Barros klubun iyun ayı üzrə cari xərcləri ödəmək üçün tələb olunan məbləği kreditorların hesabına köçürmədiyini bildirib. Buna görə iyulun 15-də “Bessa” stadionunda və ona bitişik obyektlərdə həyata keçirilən bütün fəaliyyətlərin dayandırılması qərara alınıb. Qərar klubun futbol komandaları ilə yanaşı digər idman bölmələrini də əhatə edirdi.
Bu barədə “ZeroZero” nəşri məlumat verir.
İlkin göstərişə əsasən, klub “Bessa” stadionunu və ətrafdakı infrastrukturu iyulun 31-dək işçilərdən və əşyalardan tamamilə boşaltmalı idi. Portuqaliya mediası qərarın 31 idman növündə çıxış edən təxminən 1500 idmançıya təsir göstərdiyini yazıb.
Lakin klubun bağlanması barədə xəbərlərdən sonra üzvlər və azarkeşlər “Salvar o Boavista” — “Boaviştanı xilas et” təşəbbüsü ətrafında birləşiblər.
Qrup qısa müddət ərzində klubun cari fəaliyyətini davam etdirməsi üçün tələb olunan təxminən 55 min avronu toplayıb. İflas administratoru ilə əldə edilmiş razılığa əsasən, klubun qapıları iyulun 20-də yenidən açılmalı və idman bölmələrinin fəaliyyəti bərpa edilməlidir.
“Boavişta” rəhbərliyi eyni zamanda iyulun 16-da məhkəməyə maliyyə bərpası planı təqdim edib. Planın kreditorlar və Vila-Nova-di-Qaya Kommersiya Məhkəməsi tərəfindən qəbul olunub-olunmayacağı klubun gələcəyi üçün həlledici olacaq.
“Boavişta” ətrafında yayılan məlumatlarda iki ayrı hüquqi struktur tez-tez qarışdırılır: üzvlərə məxsus “Boavista Futebol Clube” və peşəkar futbol komandasını idarə etmiş “Boavista Futebol Clube – Futebol SAD”.
Məhkəmə daha əvvəl futbol SAD-ının fəaliyyətinin 31 may 2026-cı ildən dayandırılması və şirkətin ləğvetmə prosesinə keçirilməsi barədə qərar vermişdi. Son bağlanma qərarı isə birbaşa əsas klubun özünə, stadiondakı fəaliyyətə və digər idman bölmələrinə aid idi.
Buna görə peşəkar futbol şirkətinin ləğvi klubun hüquqi şəxs kimi avtomatik yoxa çıxması demək deyil. Bununla belə, əsas klub da iflas prosesindədir və aylıq ödənişləri yerinə yetirə bilməzsə, bütün fəaliyyətinin yenidən dayandırılması mümkündür. Klub rəhbərliyi əvvəlki açıqlamasında fəaliyyətin bağlanmasının qurumun dərhal hüquqi olaraq ləğv edilməsi anlamına gəlmədiyini bildirmişdi.
1903-cü ildə yaradılan “Boavişta” 2000/2001 mövsümündə Portuqaliya çempionu olub. Klub tarixində həmçinin beş Portuqaliya kuboku və üç ölkə Superkuboku var. (
Portu təmsilçisi 2002/2003 mövsümündə UEFA Kubokunun yarımfinalına qədər yüksəlib və finala çıxmaq uğrunda “Seltik”lə qarşılaşıb.
Klub 2024/2025 mövsümündə Portuqaliya çempionatını sonuncu pillədə başa vurduqdan sonra yüksək liqanı tərk edib. Daha sonra lazımi lisenziya sənədlərini təqdim edə bilmədiyi üçün aşağı peşəkar liqalara buraxılmayıb və regional futbol səviyyəsinə düşüb. Maliyyə və heyət problemləri səbəbindən əsas komanda 2025-ci ilin payızında bir neçə oyuna çıxa bilməyib və yarışdan çəkilib.
Hazırda toplanmış vəsait “Boavişta”nın dərhal bağlanmasının qarşısını alsa da, bu, klubun tam xilas edilməsi demək deyil. Davamlı maliyyələşdirmə təmin edilməz və bərpa planı məhkəmə tərəfindən qəbul olunmazsa, 123 illik klub yenidən fəaliyyətini dayandırmaq təhlükəsi ilə qarşılaşacaq.
