Argentina Prezidenti Xavyer Miley ölkəsinin İspaniyaya qarşı keçirəcəyi 2026-cı il dünya çempionatının finalını izləmək üçün ABŞ-yə getməyəcəyini açıqlayıb.
MSNews.az xəbər verir ki, Miley matçı Buenos-Ayres yaxınlığındakı Olivos prezident iqamətgahında izləyəcək. Dövlət başçısı qərarını Argentinada “cábala” adlandırılan uğur ritualını pozmaq istəməməsi ilə izah edib.
Miley yerli “El Observador” radiosuna müsahibəsində ABŞ-a səfər etməyəcəyini qəti şəkildə bildirib:
“Bütün oyunları ilk gündən olduğu kimi Olivosdan izləməyə davam edəcəyəm”.
Argentina prezidenti turnir ərzində millinin əvvəlki yeddi qarşılaşmasını eyni məkanda izləyib. Argentina həmin oyunların hamısında qalib gəldiyindən Miley final ərəfəsində izləmə yerini və gündəlik qaydasını dəyişmək istəmir.
Bu barədə “Associated Press” məlumat yayıb.
Miley oyunları Olivos iqamətgahındakı kinozalda bacısı və Prezident Administrasiyasının baş katibi Karina Miley ilə birlikdə izlədiyini deyib. Argentina mediasının məlumatına görə, prezident matçlar zamanı dövlət neft şirkəti YPF-nin gödəkçəsini də geyinir və onu uğurlu hesab edir.
Miley İsveçrə ilə 3:1 hesabı ilə başa çatan qarşılaşma zamanı istiləndiyi üçün gödəkçəni çıxardıqdan dərhal sonra Argentinanın qol buraxdığını xatırladıb. Bundan sonra onu yenidən geyindiyini və oyunun sonunadək çıxarmadığını bildirib.
Argentina prezidentlərinin mundialın mühüm matçlarına getməməsi yeni hal deyil. 2014-cü ildə Kristina Fernandes de Kirşner, 2022-ci ildə isə Alberto Fernandes Argentinanın iştirak etdiyi final qarşılaşmalarını stadiondan izləməmişdi. Argentina futbolunda mövhumatın geniş yayılması 1990-cı ildə prezident Karlos Menemin komandanın Kameruna məğlubiyyətindən əvvəl düşərgəyə səfər etməsindən sonra daha da məşhurlaşıb.
İspaniya–Argentina finalı iyulun 19-da “New York New Jersey Stadium”da keçiriləcək. Qarşılaşma Bakı vaxtı ilə saat 23:00-da başlayacaq.
