Venesuelanın Bolivar ştatında yerləşən əsas qızıl mədən bölgələrindən birində genişmiqyaslı hərbi əməliyyat keçirildiyi bildirilir.
MSNews.az xəbər verir ki, “Bloomberg Línea” hərbçilərin Las Klaritas bölgəsində qeyri-qanuni nəzarətdə olan mədənlərə qarşı əməliyyat apardığını yazıb. Məlumata görə, əməliyyat zamanı atəş açıldığı və bəzi mədənçilərin ərazidən qaçdığı bildirilib.
“Infobae” isə yerli şahidlərə və yayılan görüntülərə istinadən bölgədə helikopterlərin uçuşu, partlayış səsləri və mədən işçilərinin Las Klaritas və Kilometr 88 ərazilərini tərk etməsi barədə məlumat yayıb. Nəşr qeyd edir ki, əməliyyat Venesuelanın ən mühüm qızıl hasilatı zonalarından biri olan Orinoko Mədən Qövsündə aparılır.
Hələlik Venesuela rəsmiləri mümkün ölənlər, yaralananlar və ya saxlanılanlar barədə rəsmi açıqlama verməyib. Həmçinin əməliyyatın qeyri-qanuni mədənçiliklə məşğul olan silahlı qruplarla birbaşa toqquşmaya çevrilib-çevrilmədiyi də rəsmi təsdiqini tapmayıb.
“Reuters” daha əvvəl yazmışdı ki, Bolivar ştatındakı qızıl mədənləri uzun illərdir kriminal qrupların, silahlı dəstələrin və qeyri-rəsmi hasilat şəbəkələrinin təsiri altında qalır. Agentliyin məlumatına görə, bölgədə təhlükəsizlik vəziyyəti Venesuelanın xarici investorları mədən sektoruna cəlb etmək planları üçün əsas maneələrdən biri hesab olunur.
Hadisə ilə bağlı rəsmi məlumatların məhdud olması bölgədə vəziyyətin miqyası barədə qeyri-müəyyənliyi artırır.🇻🇪
