“Neftçi”nin sabiq prezidenti, tanınmış idman funksioneri Sadıq Sadıqov vəfat edib.
MSNews.az xəbər verir ki, bu barədə “Neftçi İdman Klubu” İctimai Birliyi məlumat yayıb. Klubun açıqlamasında Sadıq Sadıqovun vəfatı ilə bağlı Azərbaycan idman ictimaiyyətinə başsağlığı verilib, mərhumun ailəsinə və yaxınlarına səbir dilənilib.
Sadıq Sadıqovun vəfatı barədə onun ailə üzvləri məlumat verib. Nəşr qeyd edib ki, Sadıqov 2009-2015-ci illərdə “Neftçi” PFK-ya rəhbərlik edib və həmin dövr klubun müasir tarixində uğurlu mərhələlərdən biri kimi yadda qalıb.
“Neftçi İdman Klubu”nun rəsmi saytında yer alan bioqrafik məlumata əsasən, Sadıq Sadıqov 1965-ci ildə anadan olub. O, Azərbaycan Politexnik İnstitutunu bitirib. 2009-2015-ci illərdə “Neftçi” Peşəkar Futbol Klubunun prezidenti vəzifəsində çalışıb. Onun rəhbərliyi dövründə “Neftçi” üç dəfə Azərbaycan çempionu olub, iki dəfə ölkə kubokunu qazanıb. 2012-ci ildə isə komanda Azərbaycan futbolu tarixində ilk dəfə UEFA Avropa Liqasının qrup mərhələsində çıxış edib.
Rəsmi bioqrafiyada Sadıq Sadıqovun son olaraq “Neftçi İdman Klubu” İctimai Birliyinin İdarə Heyəti sədrinin müşaviri vəzifəsini icra etdiyi qeyd olunub.
