Almaniya millisinin baş məşqçisi Yulian Nagelsmann DÇ-2026 üçün heyəti açıqlayıb. Siyahıda ən diqqətçəkən qərarlardan biri Manuel Noyerin milliyə qayıdışı olub. “Bavariya”nın 40 yaşlı qapıçısı beynəlxalq karyerasını bərpa edərək dünya çempionatında Almaniyanın əsas qapıçısı kimi çıxış etməyə hazırlaşır.
Nagelsmann mətbuat konfransında Noyeri əsas qapıçı kimi düşündüyünü təsdiqləyib. Almaniya millisinin qapıçıları sırasında Manuel Noyer, Oliver Baumann və Aleksander Nübel yer alıb. “Reuters”-in məlumatına görə, Noyer sonuncu dəfə Almaniya millisində AVRO-2024-də çıxış etmiş, daha sonra beynəlxalq karyerasını başa vurduğunu açıqlamışdı.
“Barselona”nın qapıçısı Mark-Andre ter Ştegen isə Almaniya millisinin yekun heyətinə daxil edilməyib. Ter Ştegen uzun müddət Noyerin təbii varisi kimi görülürdü, lakin son dövrdə zədələrlə üzləşib və yanvarda icarə əsasında keçdiyi “Jirona”da cəmi iki oyunda meydana çıxıb.
Noyer üçün bu, karyerasında beşinci dünya çempionatı ola bilər. O, Almaniya millisi ilə 2014-cü ildə dünya çempionu olub. Almaniya DÇ-2026-da “E” qrupunda Kurasao, Ekvador və Kot-d’İvuarla mübarizə aparacaq.
