Aprelin 26-da Çex Respublikasının Baş naziri Andrey Babiş Azərbaycana rəsmi səfərə gəlib. AZƏRTAC-ın məlumatına görə, Çexiya hökumətinin başçısı Qəbələ Beynəlxalq Hava Limanında qarşılanıb. Hava limanında Baş nazirin şərəfinə fəxri qarovul dəstəsi düzülüb.
Andrey Babişi Azərbaycanın xarici işlər naziri Ceyhun Bayramov və digər rəsmi şəxslər qarşılayıblar. Səfərin Azərbaycan-Çexiya münasibətlərinin inkişafı, siyasi dialoq və iqtisadi əməkdaşlığın genişləndirilməsi baxımından əhəmiyyət daşıdığı bildirilir.
Çexiyanın Azərbaycandakı səfirliyinin daha əvvəl yaydığı məlumata əsasən, Andrey Babişin Azərbaycana səfəri aprelin 26-28-ni əhatə edir. Səfər çərçivəsində biznes-forumlar, tematik seminarlar, B2B və B2G formatlarında görüşlərin keçirilməsi nəzərdə tutulur. Baş naziri Çexiyanın sənaye və ticarət naziri Karel Havliçek və çexiyalı sahibkarlardan ibarət nümayəndə heyəti müşayiət edir.
