İtaliya millisində Pep Qvardiola ssenarisi hələ rəsmi mərhələyə keçməsə də, bu ehtimal ətrafında maliyyə modeli artıq müzakirə olunur.
“La Gazzetta dello Sport” yazır ki, İtaliya Futbol Federasiyası ispan mütəxəssisi real hədəfə çevirmək istəsə, onun yüksək maaşının bir hissəsini sponsor hesabına qarşılamaq variantına baxa bilər. Nəşrin iddiasına görə, Qvardiola mümkün təklifi dinləməyə prinsipcə açıq ola bilər, amma əsas maneə məhz maliyyə tərəfidir.
Nəşr xatırladır ki, buna bənzər model İtaliyada daha əvvəl də tətbiq olunub. Qəzetin məlumatına görə, 2014–2016-cı illərdə Antonio Kontenin milli komandadakı təxminən 4,1 milyon avroluq maaşının yarısını texniki sponsor “Puma” qarşılamışdı. Maraqlı detal odur ki, Qvardiolanın özü də “Puma” ilə uzunmüddətli kommersiya əməkdaşlığına malikdir; şirkət onu 2019-cu ildə rəsmi brend səfiri kimi təqdim etmişdi.
İtaliya futbolu 2026-cı il Dünya Kubokundan kənarda qaldıqdan sonra federasiya prezidenti Qabriele Qravina istefa verib, baş məşqçi Cennaro Qattuzo da postundan ayrılıb. Yeni baş məşqçi ilə bağlı qərarın 22 iyun tarixində keçiriləcək FIGC prezident seçkisindən əvvəl verilməsi gözlənilmir. Yəni Qvardiola ilə bağlı danışılanlar bu mərhələdə rəsmi danışıqlardan çox, yeni rəhbərlik formalaşana qədər davam edən böyük “arzudur”.
