“Benfika”nın argentinalı futbolçusu Cianluka Prestianni UEFA tərəfindən “Real Madrid”in hücumçusu Vinisius Juniora qarşı ayrı-seçkilik xarakterli davranışa görə 6 oyunluq cəzaya məruz qalıb. Qərar fevralda Çempionlar Liqasının pley-off mərhələsində baş vermiş insidentlə bağlı verilib və UEFA bunu konkret olaraq homofob xarakterli davranış kimi qiymətləndirib.
MSNews.az xəbəri “The İndependent” nəşrinə istinadən verir.
Cəzanın detalları da açıqlanıb: 6 oyundan 3-ü şərti sayılır, həmin hissə iki illik sınaq müddətinə bağlanıb. Bundan əlavə, 1 oyunluq cəza artıq çəkilmiş hesab olunur. Yəni hazırkı vəziyyətdə Prestianni üçün dərhal qüvvədə qalan hissə üç oyunluq diskvalifikasiyadır, onun da biri artıq geridə qalıb.
Hadisə fevralda Lissabonda keçirilən “Benfika” – “Real Madrid” qarşılaşması zamanı baş vermişdi. Vinisius Junior həmin epizoddan sonra Prestiannini irqçi təhqirdə suçlamışdı, lakin UEFA-nın yekun qərarında cəza irqçilik yox, homofob ayrı-seçkilik davranışı əsasında tətbiq olunub.
“Sky Sports”-un məlumatına görə, UEFA eyni zamanda FIFA-dan bu qadağanın qlobal tətbiqini istəməyi də nəzərdə tutur. Bu isə o deməkdir ki, cəzanın yalnız UEFA klub turnirlərində yox, daha geniş futbol çərçivəsində qüvvədə olması gündəmdədir.
