İtaliya rəsmiləri ABŞ tərəfdən gündəmə gətirilən, İranın 2026-cı il Dünya Kubokundakı yerinin İtaliya ilə əvəzlənməsi təklifini qəti şəkildə rədd ediblər.
“Associated Press”-in məlumatına görə, bu fikir Donald Trampın xüsusi nümayəndəsi Paolo Zampolli tərəfindən “ehtiyat variant” kimi səsləndirilib, lakin İtaliyanın idman naziri Andrea Abodi bunu “uyğun olmayan” təklif adlandırıb və Dünya Kubokuna vəsiqənin meydanda qazanılmalı olduğunu vurğulayıb.
Mövzu ABŞ–İran qarşıdurmasının futbol müstəvisinə keçməsi fonunda gündəmə gəlib. İranın turnirdə iştirakı ilə bağlı suallar təhlükəsizlik və geosiyasi gərginlik səbəbindən artsa da, FIFA prezidenti Canni İnfantino İranın yarışdan çəkilmək üçün müraciət etmədiyini və komandanın Dünya Kubokunda oynamaq niyyətində olduğunu təsdiqləyib.
İtaliya tərəfi isə həm siyasi, həm idman prinsipləri baxımından bu ideyaya qarşı çıxıb. İtaliya Milli Olimpiya Komitəsinin rəhbəri Luçano Buonfiqlio da təklifi rədd edib və futbolun meritokratiya üzərində qurulduğunu xatırladıb. Bu, xüsusilə vacibdir, çünki İtaliya ardıcıl üçüncü dəfə Dünya Kubokuna vəsiqə qazana bilməyib və turnirə idman nəticəsi ilə düşməyib.
Məsələnin daha bir vacib tərəfi odur ki, İran hər hansı səbəbdən yarışdan kənarda qalsa belə, onu İtaliyanın əvəz etməsi real prosedura uyğun görünmür. “The Guardian”-nın məlumatına görə, belə bir ssenaridə növbəti namizəd Avropa komandası yox, Asiya zonasından ən yüksək pillədə qalan vəsiqəsiz komanda — BƏƏ olardı.
