Ermənistanın baş naziri Nikol Paşinyan aprelin 23-də Yerevanda keçirilən məşəl yürüşü zamanı Türkiyə bayrağının yandırılmasını pisləyib.
“Armenpress”-in məlumatına görə, onun mövqeyini baş nazirin mətbuat katibi Nazeli Bağdasaryan açıqlayıb. O bildirib ki, Paşinyan bu addımı “məsuliyyətsiz və yolverilməz” hesab edir və bunu açıq şəkildə “təxribatçı və gərginlik yaradan davranış” kimi qiymətləndirir.
Məlumata əsasən, hadisə 24 aprel anım günü ərəfəsində, Ermənistanda ənənəvi şəkildə təşkil olunan məşəl yürüşü zamanı baş verib. Nəşr yazır ki, yürüş Ermənistan İnqilabi Federasiyası – “Daşnaksütyun” tərəfindən təşkil olunub və Paşinyanın reaksiyası da məhz, bu hadisə ilə bağlı verilən sualın cavabında səsləndirilib.
Bağdasaryanın sözlərinə görə, beynəlxalq səviyyədə tanınmış bir dövlətin, xüsusilə də, qonşu ölkənin bayrağının yandırılması dövlət başçısı tərəfindən başqa cür qiymətləndirilə bilməz. Bu bəyanat Paşinyanın son dövrdə Ankara ilə münasibətlərin normallaşdırılması xəttini qorumağa çalışdığı bir vaxtda verilib və rəsmi Yerevanın belə aksiyaları dəstəkləmədiyini göstərir.
