İranın Bakıdakı səfirliyi Azərbaycanın maraqlarına zidd hərəkətlər etdiyi barədə iddiaları qəti şəkildə rədd edib. Səfirliyin bəyanatında bildirilib ki, bu cür ittihamlar dezinformasiya xarakteri daşıyır və İranla Azərbaycan arasında gərginlik yaratmağa hesablanıb.
Bəyanata görə, İsrail regiondakı müharibəni genişləndirməyə çalışır və bunun üçün “dezinformasiya” ilə yanaşı, “saxta bayraq” kimi təqdim edilən üsullardan istifadə edir. İran tərəfi iddia edir ki, bu kampaniyanın məqsədi Tehranla Bakı arasında münasibətləri zədələmək və əlavə gərginlik ocaqları yaratmaqdır.
Bu barədə “Mehr” agentliyində qeyd olunur.
İran səfirliyi əlavə edib ki, regionda, o cümlədən nəqliyyat infrastrukturu və digər həssas istiqamətlər ətrafında baş verən hadisələr eskalasiya strategiyasının bir hissəsi kimi təqdim olunur. Diplomatik nümayəndəlik həm Azərbaycanı, həm də regional aktorları bu cür məlumatlara qarşı ayıq olmağa çağırıb.
Son aylarda İran-Azərbaycan münasibətləri onsuz da həssas fonda inkişaf edir. Mart ayında Azərbaycan tərəfinin İran dronlarının Naxçıvana daxil olması ilə bağlı ittihamlarından sonra Bakı ilə Tehran arasında gərginlik artmışdı. İran həmin ittihamları da rədd etmişdi.
