İspaniyanın “Barselona” klubu növbəti El-Klasiko qarşılaşmasında xüsusi dizaynlı formalarla meydana çıxa bilər. Məlumata görə, komandaların sinəsində yerləşən sponsor hissəsində müğənni Olivia Rodriqonun yeni albomuna istinad yer alacaq. Bu addım klubun “Spotify” ilə əməkdaşlığı çərçivəsində həyata keçirilən növbəti kampaniya hesab olunur.
Bildirilir ki, formaların üzərində sənətçinin yeni albomu “you seem pretty sad for a girl so in love” layihəsinə vizual və ya mətn formasında istinad olacaq. Son illərdə “Barselona” “Spotify” tərəfdaşlığı sayəsində formalarında müxtəlif dünya ulduzlarının brendlərini nümayiş etdirib.
Bundan əvvəl klub xüsusi El-Klasiko oyunlarında Drake, Rosalía, The Rolling Stones və Karol G kimi məşhurlarla əməkdaşlıq etmişdi. Bu kampaniyalar həm marketinq, həm də forma satışları baxımından böyük maraq doğurmuşdu.
Yeni layihənin də El-Klasiko öncəsi qlobal diqqət yaratması gözlənilir. Klub tərəfindən rəsmi təqdimatın yaxın günlərdə açıqlanacağı ehtimal edilir.
