Ukrayna müdafiə naziri komandasının müşavirlərindən biri kimi təqdim olunan, “Flash” ləqəbi ilə tanınan Serhiy Beskrestnov bildirib ki, Rusiyaya məxsus “Shahed” tipli dron onun evinə çırpılıb.
Yerli Ukrayna media resurslarının məlumatına görə, o, sosial şəbəkə paylaşımında “bu gecə rusiyalılar məni öldürməyə çalışıblar” yazaraq, idarə olunan reaktiv “Shahed”in evinin divarına dəyib dağıntı törətdiyini, özünün isə yaralandığını açıqlayıb.
Beskrestnovun sözlərinə görə, zərbə nəticəsində evi tamamilə yararsız hala düşüb. O, sağ qalmasını “möcüzə” adlandırıb. Hadisə ilə bağlı yayılan xəbərlərdə onun bu hücumu Rusiyanın məqsədli qətl cəhdi kimi qiymətləndirdiyi bildirilir.
Beskrestnov son həftələrdə Rusiyanın Ukraynanın mobil hava hücumundan müdafiə qruplarını idarə olunan “Shahed” dronları ilə hədəfə almağa başladığını da açıq şəkildə yazmışdı. Bu kontekstdə onun evinə hücum barədə iddiası Ukrayna tərəfində məqsədli zərbə versiyası ilə əlaqələndirilir. Lakin hazırda bu hücumun konkret olaraq şəxsən onu hədəf alıb-almadığını müstəqil beynəlxalq mənbələr ayrıca təsdiqləməyib.
