Türkiyədə aparılan maraqlı sosial eksperiment ictimaiyyətdə geniş rezonans doğurub. “Sözcü” nəşrinin xəbərinə görə, xüsusi olaraq hazırlanmış bir otaqda insanların psixoloji və fiziki dözümlülüyü sınaqdan keçirilib.
Eksperiment çərçivəsində iştirakçılar tamamilə sadə, lakin stimulsuz – yəni heç bir əyləncə, texnologiya və ya diqqət yayındırıcı element olmayan otağa daxil edilib. Məqsəd insanın təkbaşına, heç bir xarici təsir olmadan nə qədər müddət qala biləcəyini müəyyən etmək olub.
Nəticələr isə gözləniləndən daha maraqlı çıxıb. İştirakçıların böyük əksəriyyəti otaqda uzun müddət qala bilməyib. Bildirilir ki, heç kim 45 dəqiqədən artıq dözə bilməyib. Bəzi iştirakçılar isə cəmi bir neçə dəqiqə sonra otağı tərk etmək məcburiyyətində qalıb.
Mütəxəssislər bunu müasir insanın daim stimula – telefon, sosial media, musiqi və digər diqqət yayındırıcı vasitələrə öyrəşməsi ilə əlaqələndirir. Onların fikrincə, insan beyni uzun müddət “boşluq” vəziyyətində qalmağa uyğun deyil və bu, narahatlıq, stress və hətta panika hissi yarada bilər.
