Cibutidə 10 aprel 2026-cı ildə keçirilən prezident seçkisinin ilkin rəsmi nəticələrinə görə, hazırkı dövlət başçısı İsmayıl Ömər Gelleh səslərin 97,81 faizini toplayaraq yenidən prezident seçilib.
“Reuters”-in məlumatına görə, onun yeganə rəqibi Məhəmməd Fərah Samatar 2,19 faiz səs toplayıb, seçici fəallığı isə təxminən 80,4 faiz olub.
78 yaşlı Gelleh 1999-cu ildən Cibutiyə rəhbərlik edir və bu qələbə onun altıncı prezidentlik müddəti olacaq. Ötən il parlament prezidentlik üçün yaş məhdudiyyətini aradan qaldırıb və bu dəyişiklik ona yenidən namizəd olmağa imkan verib.
Seçki rəqabətli mübarizə fonunda keçməyib. İki böyük müxalifət partiyası səsverməni boykot edib və Gelleh faktiki olaraq zəif rəqiblə üz-üzə qalıb. Beynəlxalq müşahidəçilər və analitiklər ölkədə siyasi azadlıqların məhdudluğu və real rəqabətin zəifliyi ilə bağlı sualları yenidən gündəmə gətirirlər.
Cibuti kiçik əraziyə və təxminən 1 milyonluq əhaliyə malik olsa da, strateji baxımdan son dərəcə önəmli ölkə sayılır. Qırmızı dənizlə Ədən körfəzi arasındakı keçidə yaxın yerləşən ölkə ABŞ, Çin, Fransa və Yaponiya kimi güclərin hərbi bazalarına ev sahibliyi edir və Efiopiya üçün əsas dəniz qapılarından biridir.
