ABŞ-da prezident Donald Trampla onun keçmiş media müttəfiqlərindən biri sayılan Taker Karlson arasında açıq qarşıdurma daha da dərinləşib. “Newsmax“-ın 10 aprel 2026-cı il tarixli xəbərinə görə, Karlson Tramp barədə “Mən həmişə Trampı bəyənmişəm və bütün qullara qarşı hiss etdiyim kimi, indi də ona yazığım gəlir” deyib. Həmin materialda qeyd olunur ki, o, əlavə olaraq Trampın “başqa qüvvələrin mühasirəsində” olduğunu və “öz qərarlarını özü verə bilmədiyini” bildirib.
Bu açıqlama son günlər Trampın İranla bağlı sərt ritorikası fonunda yaranan daxili sağçı parçalanmanın yeni mərhələsi kimi qiymətləndirilir. “ABC News” 7 aprel tarixli materialında Karlsonun Trampın Pasxa günü İran barədə paylaşımını “hər səviyyədə iyrənc” adlandırdığını yazıb. “Reuters” də eyni gün Karlsonu Trampın öz elektoratı daxilində təsir gücü olan və prezidentin İranla bağlı dilini açıq şəkildə tənqid edən əsas sağçı fiqurlardan biri kimi göstərib.
Qarşıdurma bununla məhdudlaşmayıb. “ABC News”-un 9 aprel tarixli xəbərinə görə, Tramp sosial şəbəkə paylaşımında Taker Karlson, Meqin Kelli, Kendis Ouens və Aleks Cons kimi sağçı media fiqurlarını “MAGA deyil” və “loserlər” adlandırıb. “Wall Street Journal” da Trampın Karlsonun çağırışlarına cavab olaraq onu “nə baş verdiyini anlamayan” biri kimi hədəfə aldığını yazıb.
Mübahisənin əsas fonu isə ABŞ-İran gərginliyidir. “Reuters” 7 aprel tarixli məqaləsində Trampın İran barədə “bütöv bir sivilizasiya bu gecə məhv ola bilər” tipli təhdidlərinin həm beynəlxalq aləmdə, həm də Respublikaçılar arasında narahatlıq yaratdığını bildirib. “Associated Press” isə Trampın sonradan geri addım ataraq İranla iki həftəlik atəşkəs razılaşmasına yönəldiyini yazıb. Bu mənzərədə Karlsonun son sözləri təkcə şəxsi hücum yox, həm də Trampın xarici siyasət kursuna qarşı ideoloji etiraz kimi görünür.
