İranın sürgündə yaşayan keçmiş vəliəhdi Rza Pəhləvi İslam İnqilabı Keşikçiləri Korpusunun (SEPAH) komandanlığına açıq müraciət edərək onları hakim sistemə dəstəyi dayandırmağa çağırıb. O, “X” hesabında yaydığı bəyanatda “Vilayəti-fəqih” sisteminin artıq çökməyə yaxın olduğunu bildirib və SEPAH rəhbərliyini “cinayətləri dayandırmağa” və “hakimiyyətdən geri çəkilməyə” səsləyib.
Pəhləvi müraciətində vurğulayıb ki, uzun illər davam edən müharibə siyasəti və zorakılıq İranın iqtisadi infrastrukturunu ciddi təhlükə altına salıb. O, komandanlara “məsuliyyətli çıxış yolu” seçməyi, ölkəyə “yandırılmış torpaq” miras qoymamağı, militarizmi dayandırmağı və milli resursları qorumağı tövsiyə edib. Bu məzmun onun paylaşımının xülasəsində və müraciətin müxtəlif platformalarda yayılan mətnində də əks olunur.
“Reuters“-in məlumatına görə, 65 yaşlı Rza Pəhləvi son aylarda özünü İran üçün mümkün keçid dövrü fiquru kimi təqdim edir və hazırkı hakimiyyətlə bağlanacaq hər hansı razılaşmanın yalnız vaxt udmağa xidmət edəcəyini iddia edir. O, martın sonunda ABŞ-da keçirilən CPAC tədbirində də Tehranla anlaşmanın uzunmüddətli sülh gətirməyəcəyini söyləmişdi.
Bu son çağırış İran daxilində və regionda hərbi-siyasi təzyiqin artdığı vaxta təsadüf edir. ABŞ-İsrail zərbələri, İran daxilində təhlükəsizlik böhranı və diplomatik dalan fonunda ölkə müxalifətinin ritorikası da daha sərtləşib. Bununla belə, Pəhləvinin çağırışının İran daxilində SEPAH üzərində real təsir yaradıb-yaratmayacağı hələlik məlum deyil
