İsveç sahil mühafizəsi Baltik dənizində, Qotland adasının şərqində aşkarlanan 12 kilometrlik neft ləkəsi ilə bağlı “Flora 1” tankerini saxlayaraq ölkənin cənubundakı Ystad yaxınlığında dayanacağa yönəldib. İsveç Sahil Mühafizəsi bildirib ki, gəmi şübhəli ekoloji cinayət araşdırması çərçivəsində nəzarətə götürülüb, göyərtədə 24 nəfərlik ekipaj var və tanker Aİ-nin sanksiya siyahısındadır. (
Bu barədə yerli “Kustbevakningen” nəşrinə istinadən MSNews.az xəbər verir.
Məlumata görə, “Flora 1” Rusiyanın Primorsk neft terminalından çıxmışdı və İsveç tərəfi onu Rusiya neftini daşıyan “kölgə donanması” ilə əlaqələndirir. Həmin materialda qeyd olunur ki, gəmi Aİ sanksiyalarına məruz qalıb və bu donanma adətən köhnə, zəif sığortalanmış tankerlərdən ibarət olur; belə gəmilər bəzən izləmə sistemlərini söndürmək, saxta bayraq istifadə etmək və gəmidən-gəmiyə yükləmə kimi riskli üsullara əl atır. Nəşr həmçinin sızmanın həcminin 18 kubmetrə, yəni təxminən 113 barelə qədər ola biləcəyini yazır.
İsveç hakimiyyəti daha sonra tankeri sərbəst buraxıb. Prokurorluq ekipaj üzvlərini dindirib, iki nəfərə ekoloji cinayət şübhəsi barədə məlumat verilib, lakin onlar həbs olunmayıb. Rəsmi izaha əsasən, hadisə İsveçin iqtisadi zonasında baş verdiyi üçün istintaq çərçivəsində tətbiq edilə biləcək məcburi tədbirlər məhduddur.
İsveç rəsmiləri bildirirlər ki, hazırkı vəziyyətdə neftin sahilə çatacağı gözlənilmir, amma insident ciddi narahatlıq doğurur. Mülki müdafiə naziri Karl-Oskar Bolin “kölgə donanması”nı həm təhlükəsizlik, həm də ətraf mühit baxımından ciddi risk adlandırıb. Bu hadisə Baltik regionunda Rusiya ilə əlaqəli tanker trafikinə nəzarətin son aylarda niyə sərtləşdirildiyini bir daha gündəmə gətirib.
