Norveçin “Dagsavisen” nəşrinin yaydığı məlumata görə, Ukrayna Prezidenti Volodimir Zelenski və Ukrayna xalqı 2026-cı il Nobel Sülh Mükafatına namizəd göstərilib.
Namizədliyi Oslo Universitetinin dinşünaslıq üzrə professoru Daq Öystein Endsjø irəli sürüb. Nəşr yazır ki, professor nominasiyada Ukrayna xalqı ilə Zelenskinin “Rusiya təcavüzü qarşısında Avropa demokratiyaları üçün sülhü qorumağa töhfə verdiyini” vurğulayıb.
Burada vacib detal budur ki, Nobel Komitəsi cari il üzrə namizədləri nə təsdiqləyir, nə də təkzib edir. Təşkilatın rəsmi qaydalarına görə, bu cür məlumatlar adətən nominator tərəfindən açıqlanır və Komitə namizədlikləri 50 il ərzində rəsmi şəkildə açıqlamır. Yəni Zelenskinin namizəd göstərilməsi barədə informasiya Komitənin rəsmi təsdiqi yox, nominatorun ictimailəşdirdiyi məlumat kimi qəbul olunmalıdır.
Oslo Universitetinin rəsmi səhifəsində Daq Öystein Endsjønun universitetdə professor “emeritus” – yəni artıq təqaüdə çıxmış olduğu göstərilir. Nobel Sülh Mükafatı qaydalarına əsasən isə tarix, sosial elmlər, hüquq, fəlsəfə, ilahiyyat və din sahələrində çalışan universitet professorları Nobel Sülh Mükafatına namizəd irəli sürmək hüququna malikdir. Bu baxımdan, belə bir nominasiya təqdim etməsi prosedur baxımından mümkündür.
