İranda həbsdə saxlanılan 2023-cü il Nobel Sülh Mükafatı laureatı Nərgiz Məhəmmədinin ürək tutması keçirmiş ola biləcəyi bildirilir.
MSNews.az-ın “Associated Press”-ə istinadən məlumatına görə, onun fransalı vəkili Şirin Ardakaninin dediyinə əsasən, Məhəmmədinin iki iranlı vəkili və bacısı Zəncan həbsxanasında onunla görüşdən sonra səhhətinin ağır olduğunu müəyyən ediblər. Məlumata görə, o, solğun, həddindən artıq zəif və əhəmiyyətli dərəcədə çəki itirmiş vəziyyətdə olub.
Nəşr yazır ki, həbsxanadakı məhbusların sözlərinə görə, Nərgiz Məhəmmədi martın 24-də bir saatdan çox huşsuz vəziyyətdə qalıb və daha sonra həbsxana həkimi bunun böyük ehtimalla ürək tutması olduğunu bildirib. Həmin xəbərə görə, o, hələ də sinə ağrıları və tənəffüs problemlərindən əziyyət çəkir, lakin xəstəxanaya köçürülməsinə və ya kardioloqa çıxışına icazə verilməyib.
Məhəmmədi 2025-ci ilin dekabrında yenidən saxlanılmışdı. “Reuters” həmin vaxt onun zorakı şəkildə həbs olunduğunu, daha sonra isə 2026-cı ilin fevralında ona əlavə 7 ildən çox həbs cəzası verildiyini yazmışdı. O, 2023-cü il Nobel Sülh Mükafatını qadın hüquqları və İranda ölüm hökmünə qarşı mübarizəsinə görə həbsdə olarkən almışdı.
Norveç Nobel Komitəsi hələ fevralda İranı Nərgiz Məhəmmədini dərhal azad etməyə çağırmış və onun “həyat üçün təhlükəli rəftar”la üzləşdiyini bildirmişdi.
