ABŞ-da 18 yaşadək qızlara qarşı cinsi istismar və fahişəlik şəbəkəsi yaratmaq ittihamı ilə həbsdə olan milyarder Ceffri Epşteynin ortaya çıxan yeni müsahibəsində diqqət çəkən məqam “Üçlü Komissiya” oldu.
Epşteyn bildirib ki, ABŞ-lı milyarder David Rokefeller, Şimali Amerika, Avropa və Asiyadan siyasətçilər və iş adamlarını bir araya gətirən bir istişarə platforması qurub. Epşteyn qeyd edib ki, bu qurum bəzən “İlluminati”yə bənzər, dünyanı gizli idarə edən təşkilat kimi xatırlanır, lakin Rokefeller bu iddiaları rədd edir.
Epşteyn müsahibəsində iş və siyasət dünyasında yüksək səviyyəli əlaqələrindən, Rokefeller ilə yaxın təmaslarından bəhs edib. O bildirib ki, “Üçlü Komissiya” seçilmiş siyasətçilərin qısa müddətli mandatları ilə müqayisədə iş dünyasının daha sabit rol oynadığını nəzərə alaraq yaradılıb. Epşteyn əlavə edib ki, iştirak etdiyi ilk görüşlər 1990-cı illərin əvvəllərində Tokioda keçirilib və əsas müzakirə mövzusu inflyasiya olub.
Müsahibədə Epşteyn sərvətini “təmizlənməmiş pul” kimi dəyərləndirməsi barədə irəli sürülən tənqidlərə cavab verib və bildirib ki, qazandığı vəsaiti gəlir səviyyəsi aşağı olan ölkələrdə bəzi xəstəliklərin müalicəsinə yönəldib. O, həmçinin özünü ABŞ-da “birinci səviyyəli cinsi təcavüzkar” kimi təqdim edib və köməyi alan şəxslərin pulun mənbəyini bilsələr də, münasibətlərinin dəyişməyəcəyini vurğulayıb.
