Əcnəbi media orqanları və bir sıra mənbələr ABŞ administrasiyasının İran İslam Respublikasına qarşı hərbi əməliyyat başlada biləcəyi ehtimalını gündəmə gətirir. Xəbərlərdən bəlli olur ki, ABŞ ordusunun yüksək səviyyəli rəsmiləri regiondakı müttəfiqlərə mümkün hücum üçün hazırlıq görmək lazım olduğunu bildiriblər və əməliyyatın nəhayət bu həftənin sonunda, xüsusilə bazar günü başlaya biləcəyi iddia edilir.
“Drop Site News”-un sitat gətirdiyi məlumatlara görə, ABŞ Prezidenti Donald Tramp İrana qarşı əməliyyatı “yaxın” olaraq qiymətləndirir və planlaşdırılan hərbi addımlar “rejim dəyişikliyi” kimi bir hədəfə yönələ bilər. Bu ehtimala görə, mümkün hədəflər arasında İranın nüvə və balistik raket obyektləri, hərbi bazalar da ola bilər.
Qeyd edilir ki, ABŞ ordusu regionda güclü hərbi qüvvə yığmağa davam edir, o cümlədən “USS Abraham Lincoln” ilə birlikdə çoxsaylı gəmi və döyüş təyyarələri İran körfəzinə yaxın yerləşdirilib. Bu qüvvələr hazırda “missiyaya hazırlıq” vəziyyətindədir.
Digər tərəfdən, İran tərəfi də hərbi və siyasi mövqeyini sərtləşdirib. Rəsmi Tehran bildirib ki, əgər ABŞ tərəfindən hər hansı bir hücum reallaşarsa, İran bu hərəkətə çox sərt şəkildə cavab verəcək.
Beynəlxalq ictimaiyyət və bir çox dövlətlər regionda mümkün eskalasiyanın qarşısını almaq üçün diplomatik yollara üstünlük verməyin vacibliyini vurğulayır, sərt hərbi konfliktin yalnız regiondakı sabitliyi deyil, qlobal enerji bazarına da təsir edə biləcəyini bildirirlər.
Hazırkı gərginlik şəraitində rəsmi təsdiqlənmiş bir hücumun olub-olmayacağı məlum olmasa da, regiondakı hərbi aktivlik və diplomatik müzakirələr dünya ictimaiyyətinin diqqət mərkəzində qalır.
