Azərbaycan Respublikasının Prezidenti İlham Əliyev yanvarın 26-da İsrail Dövlətinin xarici işlər naziri Gideon Saarı qəbul edib və görüş zamanı bir neçə gün əvvəl Davosda Azərbaycan və İsrail prezidentləri arasında keçirilmiş görüş məmnunluqla xatırlanaraq, həmin görüş əsnasında ikitərəfli gündəliyin əsas məsələlərinin müzakirə olunduğu bildirilib.
Söhbət zamanı ölkələr arasında münasibətlərin iqtisadi-ticari, enerji, turizm və digər sahələrdə uğurla inkişaf etdiyi vurğulanıb, kənd təsərrüfatı, su ehtiyatlarının idarə olunması, yüksək texnologiyalar və süni intellekt sahələrində əməkdaşlığın genişləndirilməsi imkanlarına toxunulub, müxtəlif səviyyələrdə qarşılıqlı səfər və təmasların tərəfdaşlığın dərinləşdirilməsinə verdiyi töhfə qeyd edilib.
Eyni zamanda, hökumətlərarası komissiyanın rolu xüsusi vurğulanaraq, bu yaxınlarda komissiyanın növbəti iclasının keçirildiyi xatırladılıb. Gideon Saar səfər çərçivəsində onu böyük biznes və işgüzar dairələrin nümayəndələrinin müşayiət etdiyini bildirərək, səfər çərçivəsində keçiriləcək Azərbaycan–İsrail biznes-forumunun iqtisadi-ticari əlaqələrin daha da inkişafına mühüm töhfə verəcəyinə əminliyini ifadə edib,
Azərbaycanda yəhudi icmasına dövlət səviyyəsində göstərilən qayğıya görə Prezident İlham Əliyevə təşəkkürünü çatdırıb. Görüşdə, həmçinin, qarşılıqlı maraq doğuran digər regional və beynəlxalq məsələlər ətrafında fikir mübadiləsi aparılıb.
