Türkiyə Prezidenti Rəcəb Tayyib Ərdoğan Balkan Sülh Platformasının nümayəndə heyətini qəbul edib.
Türkiyə Prezident Administrasiyasının İctimaiyyətlə Əlaqələr İdarəsinin rəsmi sosial media hesabında yayılan məlumata görə, qəbulda Monteneqronun Baş nazirinin müavini və xarici işlər naziri Ervin İbrahimoviç, Kosovonun Baş nazirinin müavini, xarici işlər və diaspora naziri Donika Gervalla-Şvars, Bosniya və Herseqovinanın xarici işlər naziri Elmedin Konakoviç, Şimali Makedoniyanın xarici işlər və xarici ticarət naziri Timço Mucunski, Albaniyanın Avropa və xarici işlər naziri Elisa Spiropali, həmçinin Serbiyanın xarici işlər nazirinin müavini Nevena Yovanoviç iştirak ediblər.
Görüş zamanı ölkələrin Türkiyə ilə ikitərəfli münasibətləri və regional məsələlər ətrafında fikir mübadiləsi aparılıb.
Prezident Ərdoğan Balkan Sülh Platformasının İstanbulda keçirilən ikinci toplantısından məmnunluğunu ifadə edərək, nümayəndə heyətlərinə verdikləri töhfələrə görə təşəkkür edib. O bildirib ki, sərhəd təhlükəsizliyi, enerji, texnologiya və nəqliyyat kimi mühüm mövzuların regional sahiblənmə anlayışı çərçivəsində müzakirə olunması xüsusi əhəmiyyət daşıyır.
Dünyanın və Balkan regionunun müxtəlif çağırışlarla üzləşdiyini vurğulayan Ərdoğan, platformaya üzv ölkələr arasında həmrəyliyin və qarşılıqlı anlayışın gücləndirilməsinin bu mərhələdə daha da önəm qazandığını qeyd edib.
Türkiyənin regional sabitliyin qorunması və böhranların təsirinin azaldılması istiqamətində fəal rol oynadığını bildirən Prezident, Ukrayna, Qəzza və Suriya başda olmaqla bir çox bölgədə sülh yönümlü səylərin davam etdiyini diqqətə çatdırıb. O, Balkanlarda da keçmişin ağrılı təcrübələrindən dərs çıxararaq, gələcəyə yönəlmiş yanaşmanın vacibliyini vurğulayıb.
Qəbulda Prezident Ərdoğana xarici işlər naziri Hakan Fidan, Prezident Administrasiyasının İctimaiyyətlə Əlaqələr İdarəsinin rəhbəri Burhanəddin Duran, Prezidentin Xarici Siyasət və Təhlükəsizlik üzrə baş müşaviri Akif Çağatay Kılıç və Prezidentin baş müşaviri Sabri Demir də iştirak ediblər.
