“Microsoft”-un qlobal nasazlığı: Zərər 7 milyard dollara çata bilər

"Microsoft 365" xidmətlərində baş verən qlobal nasazlıq milyonlarla istifadəçiyə, banklara, xəstəxanalara və aviaşirkətlərə təsir edib. İqtisadi itkilərin 7 milyard dollara yaxınlaşa biləcəyi ehtimal olunur.

82

“Microsoft”-un rəqəmsal xidmətlərində baş verən genişmiqyaslı qlobal nasazlıq milyonlarla istifadəçinin fəaliyyətini iflic edib. İlkin hesablamalara görə, fasilənin dünya iqtisadiyyatına vurduğu zərər 7 milyard dollara yaxınlaşa bilər.

MSNews.az xəbər verir ki, noyabrın 12-də başlayan və 24 saatdan çox davam edən nasazlıq “Microsoft 365”, “Outlook”, “Teams” və “Copilot” xidmətlərini əhatə edib. Problemlər səbəbindən istifadəçilər elektron poçt göndərmək, onlayn görüşlər keçirmək və korporativ sistemlərə daxil olmaq imkanlarını itiriblər.

“Reuters” agentliyinin məlumatına görə, nasazlıq dövlət qurumları, banklar, xəstəxanalar, aviaşirkətlər və böyük texnologiya şirkətlərinin fəaliyyətinə ciddi təsir göstərib. “Downdetector” platformasında dünya üzrə 7,4 milyondan çox nasazlıq bildirişi qeydə alınıb.

Böyük Britaniyada polis əməkdaşları onlayn cinayət müraciətlərinin qəbulunda çətinliklərlə üzləşiblər. Milli Səhiyyə Xidmətinin (NHS) bəzi bölmələri isə ehtiyat informasiya sistemlərinə və kağız sənədləşməyə keçməli olub.

Nasazlıq Avropanın birja operatoru “Euronext”-in elektron poçt əlaqələrini, Hindistanın “IndiGo”, “Akasa Air” və “Air India” aviaşirkətlərinin müştəri xidmətlərini də pozub. “OpenAI” və “Anthropic” şirkətlərinin “Microsoft” xidmətlərinə inteqrasiyalarında da problemlər yaranıb.

Tayvanda maliyyə şirkətlərindən biri istiqrazların geri alınması əməliyyatını dayandırıb, digəri isə birja əməliyyatlarını təsdiqləmək üçün faksdan istifadə etməyə məcbur olub.

“Microsoft” hadisənin server və şəbəkə infrastrukturundakı texniki problemlərlə əlaqəli olduğunu açıqlayıb. Şirkətin məlumatına görə, əvvəlki şəbəkə yenilənməsindən sonra yaranan nasazlıq bəzi serverlərin sıradan çıxmasına, qalan serverlərin isə həddindən artıq yüklənməsinə səbəb olub.

Şirkət kiberhücum əlamətlərinin aşkarlanmadığını bildirib. Noyabrın 14-də xidmətlərin tam bərpa edildiyi açıqlanıb.

İqtisadi itkilərlə bağlı hələlik yekun rəsmi rəqəm yoxdur. “Anderson Economic Group”-un ilkin məhsuldarlıq itkisi hesablamasında zərərin 7 milyard dollara yaxınlaşa biləcəyi göstərilsə də, bu məbləğ təsdiqlənmiş maliyyə itkisi deyil. “Reuters”in istinad etdiyi analitiklər isə sığortalanmış itkiləri 300–500 milyon dollar aralığında qiymətləndiriblər.