ABŞ Silahlı Qüvvələrinin Mərkəzi Komandanlığının (CENTCOM) keçmiş komandanı general Kennet Makkenziyə aid edilən yeni açıqlamada İsrailin 2011-ci ildə Suriyada Bəşər Əsəd hakimiyyətinin devrilməsinə qarşı olduğu bildirilir. Generalın sözlərinə görə, İsrail tərəfi Əsədi daha proqnozlaşdırılan və münasibət qurula bilən rəqib hesab edirdi.
MSNews.az xəbər verir ki, yayılan açıqlamaya əsasən, Makkenzi həmin dövrdə israillilərin Əsəd haqqında “iş görə biləcəyimiz adamdır” məzmununda danışdıqlarını və onu “tanış iblis” kimi xarakterizə etdiklərini bildirib.
Bu konkret açıqlamanın tam ilkin mənbəsini hazırda müstəqil şəkildə təsdiqləmək mümkün olmasa da, İsrail təhlükəsizlik və siyasi dairələrində Əsədlə bağlı belə yanaşmanın mövcud olduğu tarixi mənbələrlə təsdiqlənir.
“The Washington Post” 2011-ci ilin aprelində İsrailin keçmiş müdafiə nazirinin müavini Efraim Snehin Əsəd haqqında “biz tanıdığımız şeytana üstünlük veririk” dediyini yazırdı. Sneh bunu Əsəddən sonra Suriyada islamçı qüvvələrin hakimiyyətə gəlməsi ehtimalı ilə əsaslandırırdı.
Məsələnin kökləri daha əvvələ gedib çıxır. İsrailin keçmiş baş naziri Ariel Şaronun 2005-ci ildə ABŞ Prezidenti Corc Buşun Əsədi devirmək ideyasına qarşı çıxarkən də “tanıdığımız iblis” arqumentindən istifadə etdiyi bildirilir. İsrail Milli Təhlükəsizlik Araşdırmaları İnstitutunun materialına görə, Şaron qeyri-müəyyən alternativ və mümkün “Müsəlman Qardaşları” hakimiyyətindənsə, tanış Əsəd rejimini üstün tuturdu.
İsrail daxilində vahid mövqe olmayıb
Suriya müharibəsi dərinləşdikcə İsrail daxilində Əsədin gələcəyi ilə bağlı fikir ayrılığı yaranıb. Bir tərəf onun zəifləmiş halda hakimiyyətdə qalmasını daha proqnozlaşdırılan variant hesab edirdi. Digər tərəf isə Əsəd rejiminin İran və “Hizbullah”la sıx əlaqələrini İsrail üçün daha ciddi strateji təhlükə sayırdı.
2013-cü ildə İsrail kəşfiyyat mənbələri “The Times of Israel”-a zəifləmiş Əsəd hakimiyyətinin Suriyanın radikal islamçı qüvvələrin nəzarətinə keçməsindən daha məqbul olduğunu bildirmişdilər.
