ABŞ İranla əlaqəli mümkün təhlükə barədə məlumatlardan sonra Böyük Britaniyadakı RAF Mildenhall hərbi bazasında yerləşən təyyarələrinin bir hissəsini təcili şəkildə başqa məntəqələrə köçürüb. Eyni zamanda, Britaniyadakı iki Amerika hərbi bazasında təhlükəsizlik tədbirləri gücləndirilərək terror təhlükəsi ilə əlaqədar yüksək hazırlıq rejimi tətbiq olunub.
MSNews.az xəbər verir ki, bu barədə noyabrın 10-da “The Wall Street Journal” (WSJ) məlumat yayıb. Nəşrin ABŞ rəsmilərinə istinadən verdiyi xəbərə görə, hərbi təyyarələrin köçürülməsi noyabrın 9-da həyata keçirilib. Qərarın İranla əlaqəli mümkün təhlükə fonunda qəbul edildiyi bildirilir.
Uçuşların izlənilməsi məlumatlarına əsasən, RAF Mildenhall bazasından ən azı 10 ədəd KC-135 Stratotanker tipli havada yanacaqdoldurma təyyarəsi çıxarılıb. Təyyarələr Almaniya, İspaniya və Şotlandiyadakı müxtəlif hərbi və mülki aerodromlara istiqamətləndirilib.
Bundan əlavə, ABŞ-ın xüsusi əməliyyatlarda istifadə etdiyi CV-22 Osprey tipli təyyarələr də Mildenhall bazasından yaxınlıqdakı RAF Lakenheath bazasına köçürülüb.
Britaniyanın “Sky News” telekanalının məlumatına görə, hərbi texnikanın yerdəyişməsi noyabrın 9-da günün ikinci yarısında müşahidə olunub.
Təyyarələrin köçürülməsi ilə yanaşı, RAF Mildenhall və RAF Lakenheath bazalarında təhlükəsizlik hazırlığı FPCON Charlie səviyyəsinə qaldırılıb.
Bu, ABŞ Müdafiə Nazirliyinin beşpilləli təhlükəsizlik sistemində ikinci ən yüksək hazırlıq səviyyəsidir.
FPCON Charlie rejimi terror xarakterli hadisə baş verdikdə və ya kəşfiyyat məlumatları hərbi personalın və obyektlərin terror hücumuna məruz qala biləcəyini göstərdikdə tətbiq olunur. Belə hallarda bazalara giriş nəzarəti sərtləşdirilir, yoxlamalar və patrul fəaliyyəti artırılır.
Lakin İranla əlaqələndirilən təhlükənin konkret nədən ibarət olduğu açıqlanmayıb. ABŞ rəsmiləri hərbi obyektlərə qarşı mümkün hücumun xarakteri və vaxtı barədə ictimaiyyətə əlavə məlumat verməyiblər.
ABŞ Hərbi Hava Qüvvələrinin sözçüsü təyyarələrin müxtəlif səbəblərdən, o cümlədən təlim və əməliyyat ehtiyacları ilə əlaqədar bazalar arasında köçürüldüyünü bildirib. O, əməliyyat təhlükəsizliyini əsas gətirərək son yerdəyişmələrin səbəblərini şərh etməkdən imtina edib.
Böyük Britaniya hökuməti isə ölkədəki hərbi bazaların təhlükəsiz olduğunu açıqlayıb. Rəsmi London hərbi obyektlərin mühafizəsinin daim nəzərdən keçirildiyini və zəruri hallarda əlavə tədbirlər görüldüyünü vurğulayıb. Bu barədə “Reuters” agentliyi məlumat yayıb.
Hadisə son aylarda Britaniyadakı Amerika hərbi bazaları ətrafında təhlükəsizlik narahatlıqlarının artdığı dövrə təsadüf edir.
2026-cı ilin sentyabrında RAF Fairford bazası yaxınlığında şübhəli fəaliyyətlə bağlı araşdırma aparılmış, daha sonra iki nəfərə İran kəşfiyyatına yardım göstərmək ittihamı irəli sürülmüşdü. ABŞ həmin hadisədən sonra bazada yerləşən B-1 bombardmançılarını da geri çəkmişdi.
İranın Britaniyadakı səfiri isə ölkəsinin RAF Fairford bazasına qarşı mümkün hücum planında iştirak etməsi barədə ittihamları rədd edib.
Hazırda RAF Mildenhall bazasından təyyarələrin köçürüldüyü təsdiqlənsə də, bu addımın konkret İran hücumu təhlükəsi səbəbindən atıldığı barədə məlumatlar əsasən anonim mənbələrə istinad edir.
