Birləşmiş Ərəb Əmirliklərinin paytaxtı Əbu-Dabidə Ukrayna müharibəsinin başa çatdırılması istiqamətində növbəti diplomatik danışıqlar başlayıb. Ukrayna nümayəndə heyəti Rusiya və ABŞ ilə üçtərəfli görüşdən əvvəl Avropa ölkələri, NATO və Avropa Komissiyasının təmsilçiləri ilə məsləhətləşmələr keçirib.
MSNews.az xəbər verir ki, bu barədə noyabrın 10-da Ukrayna Xarici Kəşfiyyat Xidmətinin rəhbəri, ölkənin danışıqlar üzrə nümayəndə heyətinin başçısı Rüstəm Umerov Telegram kanalında məlumat yayıb.
“Ukrinform” agentliyinin məlumatına görə, ilk görüş Böyük Britaniya, Fransa, Almaniya, İtaliya, NATO və Avropa Komissiyasının nümayəndələrinin iştirakı ilə təşkil olunub. ABŞ Prezidentinin xüsusi nümayəndələri Stiv Uitkoff və Cared Kuşnerin də məsləhətləşmələrə qoşulacağı bildirilib.
“Birləşmiş Ərəb Əmirliklərində işə başlamışıq. İlk görüş Böyük Britaniya, Fransa, Almaniya, İtaliya, NATO və Avropa Komissiyasının nümayəndələri ilədir. Onlara ABŞ-ın xüsusi nümayəndələri Stiv Uitkoff və Cared Kuşner də qoşulacaqlar. Danışıqların növbəti mərhələsindən əvvəl mövqelərimizi uzlaşdıracaq və fəaliyyətimizi əlaqələndirəcəyik”, – deyə Umerov bildirib.
Ukrayna rəsmisinin sözlərinə görə, ilkin məsləhətləşmələrdən sonra Ukrayna, ABŞ və Rusiya nümayəndələrinin iştirakı ilə üçtərəfli danışıqların keçirilməsi nəzərdə tutulub.
Ukrayna nümayəndə heyətinin tərkibinə ölkənin bir sıra yüksəkvəzifəli rəsmiləri daxildir. Umerovla yanaşı, Prezident Ofisinin rəhbəri Kirill Budanov, onun birinci müavini Sergey Kislitsa, Ali Radanın “Xalqın xidmətçisi” fraksiyasının rəhbəri David Araxamiya və Ukrayna Müdafiə Nazirliyinin Baş Kəşfiyyat İdarəsi rəisinin müavini Vadim Skibitski danışıqlarda iştirak edirlər.
Umerov Ukrayna tərəfinin əsas prioritetlərini də açıqlayıb.
“Əsas prioritetlərimiz hərbi əməliyyatların dayandırılması, müharibədən sonra etibarlı təhlükəsizlik zəmanətlərinin təmin edilməsi, Ukraynanın iqtisadi bərpası və inkişafı, eləcə də humanitar tədbirlərdir. Bu məsələlərdə maksimum irəliləyiş əldə etmək və sülhü yaxınlaşdırmaq üçün çalışırıq”, – deyə o vurğulayıb.
“İnterfaks-Ukrayna” agentliyinin məlumatına görə, üçtərəfli danışıqların gündəliyində enerji infrastrukturuna zərbələrin dayandırılması, Qara dənizdə gəmiçiliyin təhlükəsizliyi, humanitar məsələlər və hərbi əsirlərin mübadiləsi də yer alır.
Rusiya nümayəndə heyətinə Prezident Vladimir Putinin köməkçisi Vladimir Medinskinin rəhbərlik etdiyi bildirilir. Danışıqların 10–11 noyabr tarixlərində ABŞ-ın vasitəçiliyi ilə keçirilməsi planlaşdırılıb.
Son məlumatlara əsasən, noyabrın 10-da Ukrayna, ABŞ və Rusiya arasında üçtərəfli danışıqların ilk günü də başa çatıb. “The Kyiv Independent” nəşrinin Ukrayna nümayəndə heyətinə istinadən yaydığı məlumata görə, görüşlər dörd saatdan artıq davam edib. Tərəflərin konkret razılaşma əldə etməsi barədə isə hələ rəsmi açıqlama verilməyib.
