Çinin Bee-Eater Technology şirkətinin hazırladığı, real qağayının uçuşunu təqlid edən robotlaşdırılmış quş yeni görüntüləri ilə diqqət çəkib.
MSNews.az xəbər verir ki, texnologiya və robototexnika üzrə yayılan məlumatlara əsasən, biomimetik qağayının qanad açıqlığı təxminən 1,5 metrdir. Qurğunun saatda 54 kilometrədək sürət yığdığı, tam sukeçirməz konstruksiyaya malik olduğu və bir uçuş zamanı təxminən 8–10 dəqiqə havada qala bildiyi bildirilir.
Bee-Eater Technology biomimetik uçuş aparatları üzərində uzun müddətdir işləyir. “China Daily” hələ 2019-cu ildə şirkətin “Wind Rider” adlı quşabənzər dronunu Pekində keçirilən Dünya Robot Konfransında nümayiş etdirdiyini yazmışdı. Aparat qanadlarını real quş kimi çırpmaqla yanaşı, küləkdən istifadə edərək süzə də bilirdi.
Şirkətin rəhbəri Tsay Yü həmin vaxt texnologiyanın əsas üstünlüklərindən birinin quşların təbii uçuş mexanizmini təqlid edərək enerji sərfiyyatını azaltmaq olduğunu bildirmişdi.
Belə biomimetik dronlar xarici görünüş və hərəkət baxımından adi quşlara bənzədiyi üçün ətraf mühitin müşahidəsi, tədqiqat və müxtəlif monitorinq tapşırıqlarında ənənəvi dronlardan daha az diqqət çəkə bilər. Bununla belə, yeni robot qağayının konkret kommersiya və ya hərbi istifadəsi barədə şirkət tərəfindən açıq şəkildə təsdiqlənmiş məlumat yoxdur.
