Çin kvant texnologiyaları sahəsində mühüm elmi nailiyyətə imza ataraq kvant teleportasiyasını uğurla həyata keçirib. Məlumatların minlərlə kilometr məsafəyə ani ötürülməsi “Micius” kvant peyki vasitəsilə mümkün olub və bu, kvant rabitəsi tarixində ən irəli addımlardan biri kimi qiymətləndirilir.
Alimlərin izahına görə, kvant teleportasiyası fiziki obyektlərin köçürülməsi demək deyil. Bu proses zamanı hissəciklər arasında yaranan kvant dolaşıqlığı (entanglement) vasitəsilə məlumatın vəziyyəti ötürülür. Bir hissəciyin vəziyyəti dəyişdikdə, ondan çox uzaqda yerləşən digər hissəcik eyni anda reaksiya verir. Albert Eynşteyn bu hadisəni vaxtilə “məsafədən qorxunc təsir” adlandırmışdı.
Çinli tədqiqatçılar peyk ilə yerüstü stansiyalar arasında 1200 kilometrdən artıq məsafədə kvant məlumatının ötürülməsinə nail olublar. Bu isə son dərəcə təhlükəsiz, sındırılması mümkün olmayan rabitə şəbəkələrinin artıq nəzəriyyə yox, reallığa çevrildiyini sübut edir.
Mütəxəssislər bildirirlər ki, kvant teleportasiyası təkcə elmi uğur deyil, eyni zamanda tamamilə yeni bir kommunikasiya dövrünün başlanğıcıdır. Bu texnologiya gələcəkdə internetin, dövlət və hərbi rabitə sistemlərinin, həmçinin maliyyə məlumatlarının qorunmasında inqilabi dəyişikliklərə yol aça bilər.
