“Ərəbistan Yarımadasında Əl-Qaidə” (AQAP) terror təşkilatının Yəmənin Şəbvə vilayətində Səudiyyə Ərəbistanı və Birləşmiş Ərəb Əmirliklərinin dəstəklədiyi qüvvələrə qarşı yeni hücumlarla hədələdiyi bildirilir. Təşkilat yerli qəbilələri öz üzvlərini Şəbvə Müdafiəsi qüvvələrinin sıralarından geri çağırmağa səsləyib.
MSNews.az xəbər verir ki, yayılan məlumatlara əsasən, AQAP Şəbvə vilayətinin ağsaqqallarına və qəbilə rəhbərlərinə müraciət edərək bölgədə mümkün hərbi qarşıdurmalardan uzaq durmağa çağırıb.
Təşkilat Şəbvə Müdafiəsi qüvvələrini öz hərəkət və təchizat marşrutlarını bağlamağa, həmçinin Xura bölgəsindəki mövqelərini mühasirəyə almağa cəhd göstərməkdə ittiham edib.
Yayılan bəyanatda AQAP-ın nəzarətində olan ərazilərin yaxınlığında hərbi fəaliyyətlərin davam etdiriləcəyi təqdirdə sərt cavab veriləcəyi ilə hədələndiyi bildirilir. Bununla belə, sözügedən bəyanatın tam mətninin həqiqiliyini müstəqil mənbələrdən təsdiqləmək mümkün olmayıb.
Vilayət rəhbərliyinin oktyabrın 22-də yaydığı rəsmi açıqlamaya görə, Xura bölgəsində AQAP silahlılarının hücumu nəticəsində iki hərbçi həlak olub, bir neçə nəfər yaralanıb. Şəbvə qubernatoru Avad Məhəmməd bin əl-Vəzir hücumu pisləyərək bölgədə təhlükəsizliyin təmin olunması üçün əməliyyatların davam etdiriləcəyini bildirib.
Yerli “Əl-Baud ər-Rabi” nəşri də həmin gün Xura bölgəsində Şəbvə Müdafiəsi qüvvələri ilə Əl-Qaidə üzvləri olduğu ehtimal edilən silahlılar arasında toqquşmaların baş verdiyini yazıb.
Gərginlik Səudiyyə Ərəbistanının dəstəklədiyi genişmiqyaslı hərbi əməliyyatlar fonunda yaşanır. Oktyabrın əvvəlində Yəmənin beynəlxalq səviyyədə tanınan hökuməti husilərin nəzarətindəki əraziləri geri qaytarmaq məqsədilə “Yəmən Şəfəqi” adlı hərbi əməliyyata başlayıb.
“Anadolu Agentliyi”nin məlumatına görə, Səudiyyə Ərəbistanının rəhbərlik etdiyi koalisiya əməliyyatın ilkin mərhələsində 100 döyüş təyyarəsinin iştirak etdiyini açıqlayıb.
Əməliyyatın əsas məqsədi husilərin nəzarətində olan ərazilərdə hökumət hakimiyyətini bərpa etmək və strateji Bab əl-Məndəb boğazı ətrafında nəzarəti gücləndirməkdir. Bu səbəbdən əməliyyatın birbaşa və yalnız Əl-Qaidənin məhv edilməsinə yönəldiyi barədə məlumatlar təsdiqlənmir.
Bölgədə AQAP silahlıları ilə hökumətyönlü qüvvələr arasında qarşıdurmaların davam etməsi Yəmənin cənubunda təhlükəsizlik vəziyyətini daha da mürəkkəbləşdirir.
