İtaliyanın Baş naziri Ciorcia Meloninin sağ cinahdakı siyasi rəqiblərindən biri, “Futuro Nazionale” partiyasının lideri Roberto Vannaççi Avropa İttifaqının Ukraynaya milyardlarla avro maliyyə yardımı ayırmasını kəskin tənqid edib. O, Ukrayna Prezidenti Volodimir Zelenskini Avropa ölkələrinə təzyiq göstərməkdə və müharibənin dayandırılması üçün siyasi iradə nümayiş etdirməməkdə ittiham edib.
MSNews.az xəbər verir ki, Vannaççi bu barədə oktyabrın 21-də Strasburqda Avropa Parlamentinin plenar iclasında çıxış edib. İtaliyanın “Adnkronos” agentliyinin məlumatına görə, siyasətçi Zelenskinin Avropadan əlavə 70 milyard avro maliyyə vəsaiti istəməsini sərt tənqid edib.
O, Zelenskinin mövqeyini öz sözləri ilə belə xarakterizə edib:
“Ya mənə 70 milyard avro verirsiniz, ya da 20 milyon ukraynalı Avropaya gələcək”.
İtaliyalı siyasətçi Avropanın özündə ciddi iqtisadi problemlər yaşandığı halda Ukraynanın maliyyələşdirilməsini qəbuledilməz hesab etdiyini bildirib.
Onun sözlərinə görə, Avropada ailələr gündəlik xərclərini qarşılamaqda çətinlik çəkir, müəssisələr bağlanır, enerji qiymətləri isə yüksək olaraq qalır.
Vannaççi Avropa Komissiyasının sədri Ursula fon der Lyayeni də tənqid edərək Brüsselin Ukraynaya dəstəyi davam etdirmək üçün büdcənin artırılmasını və digər sahələrdə xərclərin azaldılmasını nəzərdən keçirdiyini bildirib.
“Müharibəni maliyyələşdirmək üçün həmişə pul tapılır. Amma pis müharibədən daha yaxşı olan çətin sülhə nail olmaq üçün siyasi iradə çatışmır”, – deyə Vannaççi vurğulayıb.
Siyasətçi bundan əvvəl də Ukraynaya ayrılan vəsaitlərin İtaliya vətəndaşlarının sosial ehtiyaclarına yönəldilməli olduğunu bildirmişdi.
“The Epoch Times Italia”nın oktyabrın 19-da yaydığı məlumata görə, Vannaççi yanacaq və elektrik enerjisinin bahalaşmasını əsas gətirərək Ukraynaya əlavə maliyyə yardımına qarşı çıxıb.
